រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃពុធ (២៥ កុម្ភៈ) ថា រដ្ឋបាលសហរដ្ឋអាមេរិក ទទូចថា កិច្ចព្រមព្រៀងគ្រប់គ្រងអាវុធគួរតែពាក់ព័ន្ធត្រីភាគី ជាមួយចិន រួមនឹងសហរដ្ឋអាមេរិក និងរុស្ស៊ី។

លោក Rubio និយាយថា៖ ក្នុងសតវត្សរ៍ទី២១ គួរតែអាចមានកិច្ចព្រមព្រៀងគ្រប់គ្រងអាវុធពិតប្រាកដដោយមានការចូលរួមពីចិន។ ស្តុកអាវុធចិន បានកើនឡើងខ្លាំង ហើយជំហររបស់ចិនគឺថា ខ្លួននៅតែនៅពីក្រោយអាមេរិក និងរុស្ស៊ី ប៉ុន្តែអាមេរិកគិតថា ចិនពិតជាមានសមត្ថភាពតាមទាន់។

លោកបន្តថា៖ អាមេរិកជឿជាក់យ៉ាងមុតមាំថា ដើម្បីឱ្យកិច្ចព្រមព្រៀងនុយក្លេអ៊ែរគ្រប់ប្រភេទក្នុងសតវត្សរ៍ទី២១ មានភាពស្របច្បាប់ គឺត្រូវតែមានការចូលរួមពីប្រទេសទាំងបី គឺអាមេរិក រុស្ស៊ី និងចិន។

បំណងលើកិច្ចព្រមព្រៀងគ្រប់គ្រងអាវុធត្រីភាគីថ្មីនិងទូលំទូលាយជាងមុននេះ កើតឡើងបន្ទាប់ពីការផុតកំណត់នៃសន្ធិសញ្ញាកាត់បន្ថយអាវុធយុទ្ធសាស្ត្រថ្មី (New START) កាលពីថ្ងៃទី៥ ខែកុម្ភៈ ឆ្នាំ២០២៦។ ប្រភពមួយពីក្រសួងការបរទេសអាមេរិក និយាយថា ក្រុមមន្ត្រីអាមេរិកបានជួបគណៈប្រតិភូរុស្ស៊ី នៅទីក្រុងហ្សឺណែវ កាលពីថ្ងៃចន្ទសប្ដាហ៍នេះ ដើម្បីពិភាក្សាកិច្ចព្រមព្រៀងដែលកំណត់អាវុធនុយក្លេអ៊ែរជាយុទ្ធសាស្ត្រ ហើយកិច្ចប្រជុំជាមួយគណៈប្រតិភូចិន ក៏បានគ្រោងទុកផងដែរ ប៉ុន្តែពុំទាន់មានដំណឹងអ្វីនៅឡើយទេ។

លោក Shen Jian ឯកអគ្គរដ្ឋទូតចិនទទួលបន្ទុកកិច្ចការរំសាយអាវុធ ធ្លាប់បាននិយាយថា ទីក្រុងប៉េកាំង នឹងមិនចូលរួមក្នុងដំណាក់កាលនេះនៃការចរចាគ្រប់គ្រងអាវុធនុយក្លេអ៊ែរជាមួយទីក្រុងមូស្គូ និងទីក្រុងវ៉ាស៊ីនតោន នោះឡើយ៕