ភ្នំពេញ៖ នៅរសៀលថ្ងៃទី២២ ខែមីនា ឆ្នាំ២០២២នេះ កាកបាទក្រហមកម្ពុជា ដែលមានហ្លួងម៉ែ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានប្រគល់ថវិកាលើកទីលើកទី១២ ចំនួន ២០លានរៀល ដល់អង្គការសង្គ្រោះជនអស់សង្ឃឹម និងប្រគល់ថវិកាលើកទី១០ ចំនួន ៣០លានរៀល ជូនដល់អង្គការអាហ្វេស៊ីបកម្ពុជា សម្រាប់ផ្គត់ផ្គង់ដល់ជីវភាពកុមារ និងជនចាស់ជរារស់នៅក្នុងអង្កការទាំងពីរខាងលើ។

 លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានពាំនាំការសាកសួរសុខទុក្ខ និងកោតសរសើរពីសំណាក់សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលអង្គការទាំង២ បានខិតខំប្រឹងប្រែងជួយដល់ចាស់ជរាគ្មានទីពឹង កុមារ និងក្មួយៗទាំងអស់នៅក្នុងអង្កការបានខិតខំរៀនសូត្រ និងសូមឲ្យពួកគាត់ទាំងអស់ ចេះគោរពស្រឡាញ់គ្នាទៅវិញទៅមក និងសូមឱ្យមានសុខភាពល្អគ្រប់ៗគ្នា។

តំណាងអង្គការទាំង២ សូមថ្លែងអំណរគុណយ៉ាងជ្រាលជ្រៅ ដល់កាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូ ដល់សុខទុក្ខ ដល់ពួកគាត់គ្រប់ពេលវេលា ហើយថវិកាទាំងនេះ អង្កការនឹងផ្គត់ផ្គង់ជាអាហារ និងការស្លៀកពាក់គ្រប់គ្រាន់ ទៅដល់ក្មេងៗ ក្នុងអង្គការបន្តទៀត៕