អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃពុធ២៥ កុម្ភៈសប្ដាហ៍នេះថា កិច្ចប្រជុំកំពូលរវាងមេដឹកនាំអ៊ុយក្រែន រុស្ស៊ី និងសហរដ្ឋអាមេរិក គួរតែធ្វើឡើងតែនៅដំណាក់កាលចុងក្រោយនៃកិច្ចចរចាសន្តិភាពដើម្បី បញ្ចប់កិច្ចព្រមព្រៀង។      

ការអត្ថាធិប្បាយរបស់លោកបានបង្កឱ្យមានការសង្ស័យលើការព្យាករណ៍របស់ប្រេសិតពិសេសអាមេរិក លោក Steve Witkoff ដែលថាប្រធានាធិបតី Volodymyr Zelenskyy និងប្រធានាធិបតីរុស្ស៊ី លោក Vladimir Putin អាចជួបគ្នាភ្លាមៗបន្ទាប់ពីការចរចាសន្តិភាពជុំបន្ទាប់ ដែលទីក្រុងវ៉ាស៊ីនតោនសង្ឃឹមថានឹងរៀបចំក្នុងរយៈពេលបីសប្តាហ៍។

នៅក្នុងបទសម្ភាសន៍ជាមួយទូរទស្សន៍ Fox News ដែលបានចាក់ផ្សាយកាលពីថ្ងៃទី២១ កុម្ភៈថ្មីៗនេះ លោក Witkoff បានលើកឡើងថា ប្រធានាធិបតីអាមេរិក លោក Donald Trump អាចចូលរួមកិច្ចប្រជុំកំពូលអ៊ុយក្រែន-រុស្ស៊ីដ៏សំខាន់ ប៉ុន្តែលុះត្រាតែ លោក Trump មានអារម្មណ៍ថារូបលោកអាចសម្រេចបានរឿងនេះ និងទទួលបានលទ្ធផលល្អបំផុត។  

នៅពេលសួរអំពីមតិយោបល់របស់លោក Witkoff ដោយអ្នកយកព័ត៌មាន លោក Peskov បានសួរថា តើមានចំណុចណាមួយក្នុងការរៀបចំកិច្ចប្រជុំកំពូល រវាងលោក Putin និងលោក Zelenskyy ដែរឬទេ ដរាបណាភាគីអ៊ុយក្រែនរក្សាជំហរបច្ចុប្បន្នរបស់ខ្លួនក្នុងការចរចានោះ?។

ជាងមួយឆ្នាំនៃកិច្ចខិតខំប្រឹងប្រែងដើម្បីសន្តិភាពដែលដឹកនាំដោយលោក Trump កិច្ចព្រមព្រៀងចុងក្រោយនៅតែមិនច្បាស់លាស់ ខណៈទីក្រុងមូស្គូទាមទារឱ្យអ៊ុយក្រែនប្រគល់តំបន់ Donbas ទាំងមូល ទន្ទឹមនឹងបន្តវាយប្រហារទីក្រុង និងហេដ្ឋារចនាសម្ព័ន្ធថាមពលរបស់អ៊ុយក្រែន៕