លោក Steve Witkoff បេសកជនពិសេសរបស់លោកប្រធានាធិបតីអាមេរិក Donald Trump បានប្រាប់អ្នកចូលរួមនៅក្នុងជំនួបជាលក្ខណៈឯកជនមួយ កាលពីថ្ងៃអង្គារសប្ដាហ៍នេះថា រដ្ឋបាលកំពុងទាមទារឱ្យកិច្ចព្រមព្រៀងនុយក្លេអ៊ែរណាមួយជាមួយអ៊ីរ៉ង់ គួរតែនៅជាធរមានដោយគ្មានរយៈពេលកំណត់នោះឡើយ នេះបើយោងតាមការចុះផ្សាយរបស់គេហទំព័រព័ត៌មានអាមេរិក Axios កាលពីថ្ងៃពុធ (២៥ កុម្ភៈ) ដោយដកស្រង់សម្តីមន្ត្រីអាមេរិកនិងអ្នកផ្សេងទៀត ដែលដឹងពីជំនួបនោះ។

លោក Trump កំពុងដាក់សម្ពាធលើរដ្ឋាភិបាលអ៊ីរ៉ង់ បន្ទាប់ពីការបង្ក្រាបយ៉ាងហិង្សារបស់ខ្លួនលើក្រុមបាតុករ ហើយបានប្រមូលផ្តុំវត្តមានកងទ័ពជើងទឹកអាមេរិកយ៉ាងច្រើនសន្ធឹកសន្ធាប់ក្នុងតំបន់មជ្ឈិមបូព៌ា និងបានគំរាមវាយប្រហារដោយយោធា ប្រសិនបើទីក្រុងតេអេរ៉ង់ មិនឈានដល់កិច្ចព្រមព្រៀងដើម្បីដោះស្រាយជម្លោះដ៏យូរអង្វែងមួយ ជុំវិញកម្មវិធីនុយក្លេអ៊ែររបស់ខ្លួនទេនោះ។

របាយការណ៍ Axios បានដកស្រង់សម្តីរបស់លោក Witkoff ដែលបាននិយាយនៅក្នុងកិច្ចប្រជុំមួយនៅទីក្រុងវ៉ាស៊ីនតោនថា៖ «អាមេរិកជជែកជាមួយភាគីអ៊ីរ៉ង់ ក្រោមគោលការណ៍ដែលថា មិនមានបទប្បញ្ញត្តិផុតកំណត់នោះទេ។ មិនថាអាមេរិកទទួលបានកិច្ចព្រមព្រៀងឬអត់ក៏ដោយ ក៏គោលការណ៍របស់អាមេរិកគឺ៖ អ្នកឯងត្រូវតែប្រព្រឹត្តឱ្យបានត្រឹមត្រូវអស់មួយជីវិត» ដោយសំដៅចំៗទៅកាន់អ៊ីរ៉ង់។

យោងតាម Axios លោក Witkoff បានបន្ថែមថា កិច្ចរចរចារវាងសហរដ្ឋអាមេរិក និងអ៊ីរ៉ង់ បច្ចុប្បន្នផ្តោតលើបញ្ហានុយក្លេអ៊ែរ ប៉ុន្តែប្រសិនបើកិច្ចព្រមព្រៀងមួយត្រូវបានសម្រេច រដ្ឋបាលលោក Trump នឹងស្វះស្វែងរកការចរចាបន្តលើកម្មវិធីមីស៊ីលរបស់អ៊ីរ៉ង់ និងការគាំទ្ររបស់ខ្លួនចំពោះក្រុមជីវពលក្នុងតំបន់៕