សារព័ត៌មានរ៉យទ័រ បានរាយការណ៍កាលពីថ្ងៃពុធ (២៥ កុម្ភៈ) ថា ប្រទេសជាច្រើននៅទូទាំងពិភពលោក បានចាប់ផ្តើមដកអ្នកនៅក្នុងបន្ទុករបស់បុគ្គលិកការទូត និងបុគ្គលិកដែលមិនចាំបាច់មួយចំនួន ចេញពីទីតាំងជាច្រើននៅមជ្ឈិមបូព៌ា ឬចេញសេចក្ដីណែនាំដល់ពលរដ្ឋរបស់ខ្លួន ឱ្យពន្យារពេលធ្វើដំណើរទៅកាន់អ៊ីរ៉ង់ ស្របពេលភាពតានតឹងឆាបឆេះកាន់តែខ្លាំងរវាងទីក្រុងវ៉ាស៊ីនតោន និងតេអេរ៉ង់។

អូស្ត្រាលី និយាយថា រដ្ឋាភិបាលបានប្រាប់អ្នកនៅក្រោមបន្ទុករបស់បុគ្គលិកការទូតអូស្ត្រាលី ប្រចាំនៅអ៊ីស្រាអែល និងលីបង់ ឱ្យចាកចេញពីប្រទេសទាំងពីរ ដោយលើកឡើងពីស្ថានភាពសន្តិសុខកាន់តែយ៉ាប់យ៉ឺននៅក្នុងតំបន់។ ប្រទេសប៉ូឡូញ ក៏ដូចជាស៊ែរប៊ី បានប្រាប់ពលរដ្ឋរបស់ខ្លួននៅអ៊ីរ៉ង់ «ឱ្យចាកចេញឆាប់បំផុតតាមដែលអាចធ្វើទៅបាន»។

អាមេរិកវិញ កំពុងតែដកបុគ្គលិកដែលមិនចាំបាច់ និងសមាជិកគ្រួសាររបស់អ្នកការទូតទាំងនោះ ចេញពីស្ថានទូតរបស់ខ្លួននៅលីបង់។ កាលពីដើមខែមករា ស៊ុយអែត បានណែនាំពលរដ្ឋរបស់ខ្លួនឱ្យជៀសវាងការធ្វើដំណើរទាំងអស់ទៅអ៊ីរ៉ង់ ហើយចាកចេញពីប្រទេសនេះជាបន្ទាន់ ចំណែកស្ថានទូតឥណ្ឌាប្រចាំនៅអ៊ីរ៉ង់ បានណែនាំពលរដ្ឋខ្លួនឱ្យចាកចេញតាមគ្រប់មធ្យោបាយធ្វើដំណើរដែលអាចទៅធ្វើបាន។

ក្រៅពីនេះ ប្រជាជាតិផ្សេងទៀតដូចជា ប្រទេសស៊ីប សិង្ហបុរី អាល្លឺម៉ង់ និងប្រេស៊ីលជាដើម សុទ្ធតែបានជំរុញឱ្យពលរដ្ឋរបស់ខ្លួនចាកចេញពីអ៊ីរ៉ង់ ហើយបានណែនាំដល់ពលរដ្ឋរបស់ខ្លួនឱ្យជៀសវាងការធ្វើដំណើរទាំងអស់ទៅកាន់ប្រទេសនេះ និងចាកចេញពីប្រទេសនេះជាបន្ទាន់៕