ក្រុមហាម៉ាស និងអាជ្ញាធរប៉ាឡេស្ទីន (PA) បានថ្កោលទោសការប្រកាសរបស់សហរដ្ឋអាមេរិកថា ខ្លួននឹងផ្តល់សេវាកុងស៊ុលនៅទីតាំងលំនៅឋានមួយកន្លែងក្នុងតំបន់ West Bank ដែលកាន់កាប់ដោយអ៊ីស្រាអែល។

នៅក្នុងសេចក្តីថ្លែងការណ៍កាលពីថ្ងៃពុធ ក្រុមហាម៉ាសបានពិពណ៌នាអំពីចំណាត់ការនេះថាជា «គំរូដ៏គ្រោះថ្នាក់» និង «ការទទួលស្គាល់ជាក់ស្តែងអំពីភាពស្របច្បាប់នៃការតាំងលំឋានអាណានិគម និងការគ្រប់គ្រងការចូលកាន់កាប់នៅតំបន់ West Bank»។

គណៈកម្មការអាណានិគម និង Wall Resistance របស់អង្គការរំដោះប៉ាឡេស្ទីន បាននិយាយនៅក្នុងសេចក្តីថ្លែងការណ៍ថា ការសម្រេចនេះ «បង្កើតការរំលោភបំពានច្បាប់អន្តរជាតិយ៉ាងច្បាស់លាស់ និងបំពេញចិត្តដោយឥតលាក់លៀមចំពោះអាជ្ញាធរកាន់កាប់»។

កាលពីថ្ងៃអង្គារសប្តាហ៍នេះ ស្ថានទូតអាមេរិកប្រចាំទីក្រុងយេរូសាឡឹម បានប្រកាសថា ខ្លួននឹងចាប់ផ្តើមផ្តល់សេវាលិខិតឆ្លងដែននៅទីតាំងលំនៅឋានកាន់កាប់ដោយអ៊ីស្រាអែល ដែលមានទីតាំងនៅចន្លោះ ក្រុងBethlehem និងក្រុង Hebron នៅថ្ងៃសុក្រ។ ការតាំងលំនៅឋាន និងប៉ុស្តិ៍ជួរមុខរបស់អ៊ីស្រាអែលទាំងអស់នៅក្នុងតំបន់ West Bank គឺខុសច្បាប់ ក្រោមច្បាប់អន្តរជាតិ។

ស្ថានទូតនិយាយថា សេវាស្រដៀងគ្នានេះកំពុងត្រូវបានគ្រោងទុកសម្រាប់ទីតាំងលំនៅឋាន Beitar Illit ទីក្រុងRamallah របស់ប៉ាឡេស្ទីន និងនៅទីក្រុងផ្សេងៗទៀតក្នុងប្រទេសអ៊ីស្រាអែល ។ បច្ចុប្បន្ន សហរដ្ឋអាមេរិកផ្តល់សេវាកុងស៊ុល និងលិខិតឆ្លងដែននៅស្ថានទូតរបស់ខ្លួននៅ West Jerusalem និងទីក្រុង Tel Aviv។