រដ្ឋាភិបាលអូស្ត្រាលី បានប្រកាសកាលពីថ្ងៃពុធថា ខ្លួនបានបញ្ជាឲ្យសមាជិកគ្រួសារទាំងអស់របស់មន្ត្រីរបស់ខ្លួនដែលឈរជើងនៅអ៊ីស្រាអែលចាកចេញ ដោយលើកឡើងពីស្ថានភាពសន្តិសុខកាន់តែយ៉ាប់យ៉ឺននៅមជ្ឈិមបូព៌ា។

សេចក្តីណែនាំ ដែលចេញដោយក្រសួងការបរទេស និងពាណិជ្ជកម្មអូស្ត្រាលី បានព្រមានអំពីជម្លោះប្រដាប់អាវុធ ភាពចលាចលស៊ីវិល និងហានិភ័យនៃអំពើភេរវកម្ម ដោយជំរុញឲ្យប្រជាជនអូស្ត្រាលីពិចារណាឡើងវិញអំពីការធ្វើដំណើរទៅកាន់អ៊ីស្រាអែល និងលើកទឹកចិត្តអ្នកដែលនៅទីនោះរួចហើយឲ្យ ចាកចេញ ខណៈពេលដែលជម្រើសពាណិជ្ជកម្ម នៅតែមាន ដោយលើកឡើងពីការលុបចោលជើងហោះហើរដែលអាចកើតមាន និងការបិទដែនអាកាស។

ចំណាត់ការនេះ បានធ្វើឡើង បន្ទាប់ពីការសម្រេចចិត្តស្រដៀងគ្នានេះដោយសហរដ្ឋអាមេរិក ដែលបានជម្លៀសបុគ្គលិកមិនចាំបាច់ចេញពីស្ថានទូតរបស់ខ្លួននៅលីបង់ នៅដើមសប្តាហ៍នេះ។ ប្រព័ន្ធផ្សព្វផ្សាយលីបង់ បានរាយការណ៍ថា បុគ្គលិកស្ថានទូតអាមេរិករាប់សិបនាក់ បានចាកចេញពីទីក្រុងបេរូតកាលពីថ្ងៃ     ចន្ទ។

ការជម្លៀសនេះ បានកើតឡើង នៅពេលដែលទីក្រុងតេអេរ៉ង់ និងទីក្រុងវ៉ាស៊ីនតោន គ្រោងនឹងធ្វើកិច្ចចរចានុយក្លេអ៊ែរដោយប្រយោលលើកទី ៣ របស់ពួកគេ នៅប្រទេសស្វ៊ីស នៅថ្ងៃព្រហស្បតិ៍នេះ ក្នុងកិច្ចខិតខំប្រឹងប្រែង ដើម្បីបន្ថយភាពតានតឹងផ្នែកយោធានៅក្នុងតំបន់រវាងប្រទេសទាំងពីរ៕