រដ្ឋាភិបាលស្វ៊ីសបានប្រកាសកាលពីថ្ងៃពុធថា ការទិញ និងនាំចូលឧស្ម័នធម្មជាតិរាវរបស់រុស្ស៊ី នឹងត្រូវហាមឃាត់ទាំងស្រុង ក្នុងពេលឆាប់ៗនេះ ខណៈដែលប្រទេសនៅតំបនជួរភ្នំ Alpine នេះ កំពុងសម្របខ្លួនទៅនឹងទណ្ឌកម្មជុំចុងក្រោយរបស់សហភាពអឺរ៉ុប។

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា៖«ចាប់ពីថ្ងៃទី ២៥ ខែមេសា ការហាមឃាត់ទាំងស្រុងលើការទិញ និងនាំចូលឧស្ម័នធម្មជាតិរាវ (LNG) របស់រុស្ស៊ី នឹងត្រូវអនុវត្ត នៅក្នុងប្រទេស       ស្វ៊ីស»។

រដ្ឋាភិបាលបានបន្ថែមថា ទោះបីជាក្នុងករណីកិច្ចសន្យាផ្គត់ផ្គង់រយៈពេលវែងដែលមានស្រាប់ក៏ដោយ រយៈពេលអន្តរកាល នឹងត្រូវអនុវត្ត រហូតដល់ចុងឆ្នាំនេះ។

រដ្ឋាភិបាលនេះ បាននិយាយថា៖«វិធានការនេះ មានគោលបំណងកាត់បន្ថយប្រាក់ចំណូលរបស់រុស្ស៊ីពីការលក់ឥន្ធនៈហ្វូស៊ីល ដែលជាប្រភពហិរញ្ញប្បទានដ៏សំខាន់សម្រាប់សង្គ្រាមប្រឆាំងនឹងអ៊ុយក្រែន»។

ការសម្រេចនេះ គឺជាវិធានការមួយក្នុងចំណោមវិធានការមួយចំនួន ដែលរដ្ឋាភិបាលស្វ៊ីសបានអនុម័តកាលពីថ្ងៃពុធ ដើម្បីឲ្យស្របតាមកញ្ចប់ទណ្ឌកម្មលើកទី ១៩ របស់សហភាពអឺរ៉ុបប្រឆាំងនឹងរុស្ស៊ី ដែលត្រូវបានអនុម័ត ដោយប្លុកនេះនៅចុងឆ្នាំមុន។

ចាប់តាំងពីការចាប់ផ្តើមនៃការឈ្លានពានទ្រង់ទ្រាយធំរបស់ទីក្រុងមូស្គូលើអ៊ុយក្រែនកាលពី ៤ឆ្នាំមុន ប្រទេសស្វ៊ីសដែលមិនមែនជាសមាជិកសហភាពអឺរ៉ុប បានអនុវត្តទណ្ឌកម្មសេដ្ឋកិច្ចរបស់ប្លុកនេះ លើប្រទេសរុស្ស៊ី៕