សេចក្ដីរាយការណ៍របស់សារព័ត៌មានរ៉យទ័រ បាននិយាយកាលពីថ្ងៃពុធ (២៥ កុម្ភៈ) ថា អ្នកប្រើប្រាស់នៅសហរដ្ឋអាមេរិក ដែលរំពឹងថានឹងមានការធ្លាក់ចុះនៃតម្លៃទំនិញ បន្ទាប់ពីសេចក្ដីសម្រេចរបស់តុលាការកំពូល លុបចោលពន្ធគ្រាអាសន្នរបស់សេតវិមាន ទំនងជាត្រូវខកចិត្ត ដោយសារតែអាជីវកម្មនានាពុំមានផែនការបន្ធូរបន្ថយតម្លៃទំនិញនោះទេ ដើម្បីទូទាត់ថ្លៃដើមខ្ពស់ដែលខ្លួនបានចំណាយកាលពីមុន និងក្នុងពេលដែលពួកគេខិតខំទារសំណងពន្ធមកវិញ។

សេចក្តីសម្រេចរបស់តុលាការកំពូលអាមេរិក កាលពីសប្តាហ៍មុន គឺជាជ័យជម្នះដ៏ធំមួយសម្រាប់អាជីវកម្មជាង ១ពាន់កន្លែង ដែលបានប្តឹងរដ្ឋាភិបាលអាមេរិក ដោយអះអាងថា លោកប្រធានាធិបតី Donald Trump ពុំមានសិទ្ធិអំណាចផ្នែកច្បាប់គ្រប់គ្រាន់ក្នុងការកំណត់ពន្ធ ក្រោមច្បាប់អំណាចសេដ្ឋកិច្ចបន្ទាន់អន្តរជាតិឆ្នាំ១៩៧៧ នោះទេ។

ប៉ុន្តែសេចក្ដីសម្រេចចិត្តនេះក៏បង្កការភ័ន្តច្រឡំខាងការិយាធិបតេយ្យសម្រាប់អ្នកនាំចូល មេធាវី និងមន្ត្រីរដ្ឋាភិបាលផងដែរ ពីព្រោះតុលាការមិនបញ្ជាក់ថា រដ្ឋាភិបាលអាមេរិក គួរប្រគល់ប្រាក់ពន្ធប្រមាណ ១៧៥ ពាន់លានដុល្លារ ដែលខ្លួនបានប្រមូលរួចហើយនោះ មកវិញដោយរបៀបណាឡើយ។

ម្ចាស់អាជីវកម្មខ្នាតតូចជាច្រើនបានប្រាប់សារព័ត៌មានរ៉យទ័រថា ដោយសារតែអាជីវកម្មនានារំពឹងថានឹងត្រូវរង់ចាំយូរសម្រាប់ការសងប្រាក់មកវិញ អ្នកប្រើប្រាស់ក៏មិនគួររំពឹងថានឹងមើលឃើញការធូរស្រាលនៃតម្លៃទំនិញនោះដែរ ព្រោះតែពន្ធថ្មីរបស់លោក Trump ទើបតែចូលជាធរមានក្នុងសប្ដាហ៍នេះ។

លោក Josh Ketter នាយកប្រតិបត្តិក្រុមហ៊ុន Spreetail នៅអាមេរិក បាននិយាយថា៖ ដូចជាស្ថាប័នដទៃដែរ ក្រុមហ៊ុនលោក «ពុំមានផែនការប្ដូរតម្លៃទំនិញទេ»។ លោក Ketter ដែលក្រុមហ៊ុនលោកបានបង់ពន្ធប្រហែល ៥០ លានដុល្លារក្នុងឆ្នាំ២០២៥ បាននិយាយថា «ប្រសិនបើអាជីវកម្មទទួលបានសំណងវិញមែន នោះក៏នឹងទូទាត់បានតែមួយផ្នែកប៉ុណ្ណោះសម្រាប់ការខាតបង់កាលពីឆ្នាំមុន»៕