ក្រសួងរតនាគារសហរដ្ឋអាមេរិក កាលពីថ្ងៃពុធ (២៥ កុម្ភៈ) បានដាក់ទណ្ឌកម្មជាង ៣០ លើបុគ្គល អង្គភាព និងនាវានៃ «កងនាវាស្រមោល» ដែលខ្លួនបាននិយាយថា បានជួយសម្រួលដល់ការលក់ប្រេងខុសច្បាប់ ការផលិតមីស៊ីលបាលីស្ទិក និងអាវុធរបស់ប្រទេសអ៊ីរ៉ង់។

ក្រសួងបានឱ្យដឹងថា ការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារ ក៏បានកំណត់គោលដៅលើបណ្តាញជាច្រើនដែលជួយដល់កងឆ្មាំបដិវត្តន៍អ៊ិស្លាមអ៊ីរ៉ង់ និងក្រសួងការពារជាតិ និងភស្តុភារកងទ័ព ក្នុងការទទួលបានវត្ថុធាតុដើម និងគ្រឿងចក្រដែលចាំបាច់សម្រាប់ការផលិតមីស៊ីលបាលីស្ទិក និងអាវុធផ្សេងៗទៀត។

ប្រធានាធិបតីអាមេរិក លោក Donald Trump បានចាប់ផ្តើមយុទ្ធនាការរឹតបន្តឹងសេដ្ឋកិច្ចរបស់អ៊ីរ៉ង់។ លោកក៏បានបញ្ជូនកងកម្លាំងយោធាអាមេរិក ទៅកាន់មជ្ឈិមបូព៌ា និងបានព្រមានអំពីលទ្ធភាពនៃការវាយប្រហារ ប្រសិនបើទីក្រុងតេអេរ៉ង់ មិនឈានដល់កិច្ចព្រមព្រៀងដើម្បីដោះស្រាយជម្លោះដ៏រ៉ាំរ៉ៃជុំវិញកម្មវិធីនុយក្លេអ៊ែររបស់ខ្លួនទេនោះ។

រដ្ឋមន្រ្តីក្រសួងរតនាគារ លោក Scott Bessent បានថ្លែងក្នុងសេចក្តីថ្លែងការណ៍មួយថា៖ «អ៊ីរ៉ង់ កេងប្រវ័ញ្ចប្រព័ន្ធហិរញ្ញវត្ថុដើម្បីលក់ប្រេងខុសច្បាប់ សម្អាតប្រាក់ចំណេញ លទ្ធកម្មសមាសធាតុសម្រាប់កម្មវិធីអាវុធនុយក្លេអ៊ែរ និងអាវុធធម្មតា និងគាំទ្រដល់ក្រុមភេរវករតំណាងរបស់ពួកគេ»៕