ឧបនាយករដ្ឋមន្ត្រី និងជារដ្ឋមន្ត្រីការបរទេសហ្ស៊កដានី លោក Ayman Safadi កាលពីថ្ងៃពុធ បានពិភាក្សាអំពីស្ថានភាពនៅតំបន់ហ្កាហ្សា និងតំបន់វេសបែង ដែលគ្រប់គ្រងដោយអ៊ីស្រាអែល ជាមួយអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូតឺរេស ដោយសង្កត់ធ្ងន់លើតម្រូវការបន្ទាន់ក្នុងការអនុវត្តកិច្ចព្រមព្រៀងបទឈប់បាញ់នេះ។

យោងតាមសេចក្តីថ្លែងការណ៍របស់ក្រសួងការបរទេស ភាគីទាំងពីរបានពិនិត្យឡើងវិញនូវការវិវត្តក្នុងអំឡុងពេលនៃការសន្ទនាតាមទូរស័ព្ទ ដោយសង្កត់ធ្ងន់លើសារៈសំខាន់នៃការអនុវត្តបទឈប់បាញ់យ៉ាងពេញលេញ ខណៈពេលដែលពង្រឹងកិច្ចខិតខំប្រឹងប្រែងដើម្បីធានាបាននូវការផ្តល់ជំនួយមនុស្សធម៌គ្រប់គ្រាន់ ប្រកបដោយចីរភាព និងមិនមានការរារាំងចូលទៅក្នុងតំបននេះ។

ការពិភាក្សាក៏បានដោះស្រាយភាពតានតឹងកើនឡើង នៅក្នុងតំបន់វេសបែងផងដែរ។ លោក Safadi បានព្រមានប្រឆាំងនឹងអ្វីដែលលោកបានពិពណ៌នាថា ជាវិធានការខុសច្បាប់របស់អ៊ីស្រាអែលដែលមានគោលបំណងបញ្ចូលដីប៉ាឡេស្ទីន រួមទាំងការកំណត់តំបន់បន្ថែមជា «ដីរដ្ឋ» ការពង្រីកអំណាចរបស់អ៊ីស្រាអែលលើលិខិតអនុញ្ញាតសាងសង់ និងនីតិវិធីរុះរើ នៅក្នុងតំបន់ដែលគ្រប់គ្រងដោយអាជ្ញាធរប៉ាឡេស្ទីន។

លោកបានព្រមានថា វិធានការបែបនេះ ប្រឈមនឹងការធ្វើឲ្យប៉ះពាល់ដល់ទស្សនវិស័យសម្រាប់សន្តិភាព និងធ្វើឲ្យខូចដល់លទ្ធភាពនៃដំណោះស្រាយរដ្ឋពីរ។

ភាគីទាំងពីរបានសង្កត់ធ្ងន់លើតម្រូវការសម្រាប់កិច្ចខិតខំប្រឹងប្រែងក្នុងតំបន់ និងអន្តរជាតិដែលសម្របសម្រួលគ្នា ដើម្បីទប់ស្កាត់ភាពតានតឹង និងជំរុញមាគ៌ានយោបាយមួយដែលការពារសន្តិសុខ និងស្ថិរភាពក្នុងតំបន់៕