កាលពីថ្ងៃពុធ (២៥ កុម្ភៈ) ប៉េរូ បានប្រកាសដាក់ស្រុកជិតពាក់កណ្តាលនៃផ្ទៃប្រទេសក្នុងស្ថានភាពអាសន្ន បន្ទាប់ពីមានភ្លៀងធ្លាក់ខ្លាំង បំណាក់ដី និងការជន់លិចនៃទឹកជំនន់ ដែលបណ្តាលមកពីបាតុភូតកើនឡើងកម្ដៅមហាសមុទ្រ ដែលអាជ្ញាធរផ្សារភ្ជាប់ទៅនឹងបាតុភូតអាកាសធាតុ អ៊ែលនីញ៉ូ កូស្តេរ៉ូ (El Niño Costero) ឬហៅថា អ៊ែលនីញ៉ូឆ្នេរសមុទ្រ។

ក្រឹត្យប្រកាសអាសន្ន ដែលចុះហត្ថលេខាដោយប្រធានាធិបតីបណ្តោះអាសន្ន និងបានចេញផ្សាយក្នុងព្រឹត្តិបត្រផ្លូវការរបស់រដ្ឋ មានគោលបំណងពន្លឿនការផ្តល់ថវិកាដល់អាជ្ញាធរមូលដ្ឋាន និងថ្នាក់តំបន់ ដើម្បីការពារហេដ្ឋារចនាសម្ព័ន្ធសំខាន់ៗ ព្រមទាំងការពារអាយុជីវិត និងសុខភាពរបស់ប្រជាពលរដ្ឋ។ ស្រុកជាង ៧០០ស្រុក នៅទូទាំងឆ្នេរសមុទ្រប៉ាស៊ីហ្វិក តំបន់ភ្នំអង់ និងតំបន់អាម៉ាហ្សូន ត្រូវបានដាក់ក្នុងស្ថានភាពអាសន្ននាពេលនេះ។

ក្រសួងដឹកជញ្ជូនរបស់ប៉េរូ បាននិយាយកាលពីថ្ងៃពុធថា ផ្លូវថ្នល់ប្រហែលជីត ១ពាន់គីឡូម៉ែត្រ នៅទូទាំងប្រទេសត្រូវបានខូចខាត ដោយការបំផ្លិចបំផ្លាញប្រមូលផ្តុំខ្លាំងនៅក្នុងតំបន់ចំនួន៤ ដែលរងគ្រោះធ្ងន់ធ្ងរជាងគេ។ ផ្លូវសំខាន់ៗទាំងនេះបម្រើដល់មនុស្សជាងកន្លះលាននាក់ជារៀងរាល់សប្តាហ៍។

អាជ្ញាធរក៏ធ្វើបច្ចុប្បន្នភាពចំនួនអ្នកស្លាប់ផងដែរ ដោយមានមនុស្ស ៦៨ នាក់បាត់បង់ជីវិត ដោយសារមូលហេតុពាក់ព័ន្ធនឹងភ្លៀងធ្លាក់តាំងពីខែធ្នូ ឆ្នាំមុនមក។ យោងតាមអាជ្ញាធរ ទឹកមហាសមុទ្រប៉ាស៊ីហ្វិកកំពុងឡើងកម្ដៅ ហើយបាតុភូត អ៊ែលនីញ៉ូ កូស្តេរ៉ូ ត្រូវបានរំពឹងថានឹងកាន់តែខ្លាំងឡើងក្នុងខែមីនា ខាងមុខនេះ។ គួរឱ្យដឹងថា ការឡើងកម្ដៅនៃទឹកមហាសមុទ្រ នាំឱ្យមានអត្រារំហួតខ្ពស់ និងភ្លៀងធ្លាក់ខ្លាំង ក៏ដូចជាការកើនឡើងនៃលំហូរទឹកទន្លេ ដែលអាចបង្កជាទឹកជំនន់ដ៏មហន្តរាយ៕