ប្រភពពីអ៊ុយក្រែន និងប្រភពផ្សេងទៀតបានឱ្យដឹងថា ប្រធានាធិបតីអាមេរិក លោក Donald Trump បានជំរុញសមភាគីអ៊ុយក្រែន លោក Volodymyr Zelenskyy ក្នុងអំឡុងពេលសន្ទនាតាមទូរសព្ទកាលពីថ្ងៃពុធ (២៥ កុម្ភៈ) ឱ្យបញ្ចប់សង្គ្រាមជាមួយរុស្ស៊ី ឱ្យបានឆាប់តាមដែលអាចធ្វើទៅបាន នេះបើយោងតាមការចុះផ្សាយរបស់គេហទំព័រព័ត៌មានអាមេរិក Axios។

យោងតាមប្រភពដដែល លោក Trump កំពុងស្វះស្វែងរកកិច្ចព្រមព្រៀងសន្តិភាពមួយឱ្យបានត្រឹមរដូវក្ដៅខាងមុខនេះ ទោះបីជាការខ្វែងគំនិតជាមូលដ្ឋានរវាងទីក្រុងមូស្គូ និងទីក្រុងគីវ នៅតែបន្តកើតមានក៏ដោយ ជាពិសេសទាក់ទងនឹងការគ្រប់គ្រងលើដែនដីនៅភាគខាងកើតអ៊ុយក្រែន។

កិច្ចសន្ទនានេះមានរយៈពេលប្រហែល ៣០ នាទី ហើយមុនការជជែកគ្នានេះ ក៏មានជំនួបតាមការគ្រោងទុកមួយនៅទីក្រុងហ្សឺណែវ (Geneva) រវាងបេសកជនរបស់លោក Trump គឺលោក Jared Kushner និងលោក Steve Witkoff ជាមួយក្រុមចរចារបស់អ៊ុយក្រែន ផងដែរ។

ប្រភពបានបន្ថែមថា លោក Zelenskyy បានបង្ហាញក្តីសង្ឃឹមថា សង្គ្រាមអាចនឹងបញ្ចប់នៅក្នុងឆ្នាំនេះ ខណៈលោក Trump បានឆ្លើយតបវិញថា ជម្លោះនេះបានអូសបន្លាយយូរហួសហេតុពេកហើយ ដោយលោកបានសម្តែងបំណងចង់ឱ្យសង្រ្គាមបញ្ចប់ ក្នុងរយៈពេលត្រឹមតែ ១ខែប៉ុណ្ណោះ។

ប្រភពបញ្ជាក់ថា លោក Trump បានបង្ហាញការត្រៀមខ្លួនក្នុងការរៀបចំកិច្ចប្រជុំកំពូលមួយ ដែលមានការចូលរួមពីលោក Trump លោក Zelenskyy និងលោក Putin របស់រុស្ស៊ី ប្រសិនបើជំនួបនាពេលខាងមុខរវាងអ្នកចរចាអាមេរិក រុស្ស៊ី និងអ៊ុយក្រែន ដែលគ្រោងធ្វើឡើងនៅដើមខែមីនា សម្រេចបាននូវវឌ្ឍនភាពជាក់ស្តែងណាមួយ៕