លោក Kirill Logvinov ប្រធាននាយកដ្ឋានអង្គការអន្តរជាតិរបស់ក្រសួងការបរទេសរុស្ស៊ី បានប្រាប់សារព័ត៌មាន TASS ថា ប្រទេសនេះបានចោទសួរអំពីធម្មនុញ្ញ និងអាណត្តិរបស់ក្រុមប្រឹក្សាសន្តិភាព ដែលកំពុងត្រូវបានបង្កើតឡើង តាមគំនិតផ្តួចផ្តើមរបស់សហរដ្ឋអាមេរិក។ 

អ្នកការទូតរូបនេះ បានរំលឹកថា កិច្ចប្រជុំលើកដំបូងរបស់ក្រុមប្រឹក្សាសន្តិភាពដឹកនាំដោយប្រធានាធិបតីអាមេរិក លោក ដូណាល់ ត្រាំ ត្រូវបានធ្វើឡើង នៅទីក្រុងដាវ៉ូស ( Davos) ប្រទេសស្វ៊ីស នៅថ្ងៃទី ២២ ខែមករា ហើយកិច្ចប្រជុំលើកទី ២ របស់ខ្លួន បានធ្វើឡើង នៅទីក្រុងវ៉ាស៊ីនតោន នៅថ្ងៃទី ១៩ ខែកុម្ភៈ។ លោកបានពន្យល់ថា៖«ទីក្រុងមូស្គូត្រូវបានអញ្ជើញឲ្យចូលរួមកិច្ចប្រជុំទាំងពីរ ប៉ុន្តែតំណាងរុស្ស៊ី មិនបានចូលរួមទេ ហើយដៃគូប្រ៊ីក ( BRICS) មួយចំនួនរបស់យើង ក៏មិនបានចូលរួមដែរ។ ដូចដែលបានដឹងហើយថា ក្រុមប្រឹក្សាសន្តិភាពដំបូងឡើយ ត្រូវបានបង្កើតឡើង ជាស្ថាប័នសម្រាប់ការគ្រប់គ្រង និងការគ្រប់គ្រងខាងក្រៅលើតំបន់ហ្កាហ្សាហ្សា។ នេះគឺជារបៀបដែលរចនាសម្ព័ន្ធនេះ ត្រូវបានដាក់នៅលើផែនការសន្តិភាពដ៏ទូលំទូលាយរបស់លោក ត្រាំ សម្រាប់តំបន់ហ្កាហ្សា ដែលត្រូវបានភ្ជាប់ជាឯកសារបន្ថែមទៅនឹងសេចក្តីសម្រេចលេខ ២៨០៣ របស់ក្រុមប្រឹក្សាសន្តិសុខUN ដែលបានអនុម័ត»។  

លោក Logvinov បានកត់សម្គាល់ថា៖«វាមិនមែនជារឿងអាថ៌កំបាំងទេដែលធម្មនុញ្ញនៃក្រុមប្រឹក្សាសន្តិភាពបានកំណត់វាថា ជារចនាសម្ព័ន្ធអន្តរជាតិថ្មីមួយដែលត្រូវបានបង្កើតឡើង ដើម្បីជំនួស «យន្តការដែលជារឿយៗ បានបង្ហាញថា គ្មានប្រសិទ្ធភាព»។ អាណត្តិរបស់ក្រុមប្រឹក្សានេះ ត្រូវបានកំណត់ថា ជាការលើកកម្ពស់សន្តិភាពរយៈពេលវែង នៅក្នុងតំបន់ដែលរងផលប៉ះពាល់ដោយជម្លោះ ឬស្ថិតនៅក្រោមការគំរាមកំហែងនៃជម្លោះ ហើយតំបន់ហ្កាហ្សាស្ទ្រីបមិនត្រូវបានលើកឡើងសូម្បីតែម្តង»។

លោកបានសង្កត់ធ្ងន់ថា៖«ជាធម្មតា វិធីសាស្រ្តបែបនេះ ផ្តល់មូលដ្ឋានដើម្បីសួរអំពីរបៀបដែលក្រុមប្រឹក្សាសន្តិភាព នឹងរួមរស់ជាមួយអង្គការសហប្រជាជាតិ និងក្រុមប្រឹក្សាសន្តិសុខរបស់ខ្លួន ដែលជាស្ថាប័នតែមួយគត់ដែលទទួលស្គាល់ជាសកលសម្រាប់រក្សាសន្តិភាព និងសន្តិសុខអន្តរជាតិ»៕