នៅថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) នេះ សហរដ្ឋអាមេរិកបានសម្រាលខ្លះនូវការហាមឃាត់ប្រេងលើគុយបា ប៉ុន្តែរដ្ឋមន្ត្រីការបរទេស លោក Marco Rubio បានអំពាវនាវឲ្យប្រទេសកោះនេះធ្វើការផ្លាស់ប្តូរ «យ៉ាងធំ» ដោយនិយាយថា រដ្ឋាភិបាលកុម្មុយនីស្តមួយនេះ មានតែស្តីបន្ទោសខ្លួនឯងប៉ុណ្ណោះ ដែលធ្វើឲ្យមានវិបត្តិសេដ្ឋកិច្ចជាប្រវត្តិសាស្ត្រនេះ។

លោក Rubio ដែលជាជនជាតិអាមេរិកដើមកំណើតគុយបា និងជាអ្នករិះគន់រដ្ឋាភិបាលទីក្រុងឡាហាវ៉ាន (Havana) ជាយូរមកហើយ បានឮពីក្ដីបារម្ភ ដែលថា ភាពចលាចលរបស់កោះនេះអាចធ្វើឲ្យតំបន់ទាំងមូលអស្ថិរភាព ខណៈពេលដែលលោកបានចូលរួមក្នុងកិច្ចប្រជុំកំពូលសហគមន៍ការ៉ាអ៊ីព។

អំឡុងពេលចូលរួមក្នុងកិច្ចពិភាក្សា នៅលើប្រទេសកោះតូចមួយ គឺ Saint Kitts & Nevis លោក Rubio បានការពារយ៉ាងម៉ឺងម៉ាត់ ចំពោះការវាយប្រហាររបស់សហរដ្ឋអាមេរិក កលាពីថ្ងៃទី៣ ខែមករា ជាហេតុការណ៍ដែលបានទម្លាក់មេដឹកនាំឆ្វេងនិយមរបស់ប្រទេសវ៉េណេស៊ុយអេឡា លោក Nicolas Maduro។

បន្ទាប់មក សហរដ្ឋអាមេរិកបានរារាំងភ្លាមៗមិនឲ្យវ៉េណេស៊ុយអេឡានាំចេញប្រេងទៅកាន់គុយបា ដែលបានពឹងផ្អែកលើសម្ព័ន្ធមិត្តរបស់ខ្លួន សម្រាប់តម្រូវការជិតពាក់កណ្តាលរបស់ខ្លួន ជាចំណាត់ការដែលបង្កឲ្យមានការខ្វះខាតប្រេងឥន្ធនៈ និងការដាច់ចរន្តអគ្គិសនីជាបន្តបន្ទាប់ នៅលើកោះនេះ។

តែក្រសួងរតនាគារបានប្រកាសនៅថ្ងៃទី២៦ ខែកុម្ភៈនេះថា សហរដ្ឋអាមេរិកនឹងអនុញ្ញាតឲ្យមានការនាំចេញប្រេងរបស់វេណេស៊ុយអេឡាទៅកាន់ប្រទេសគុយបា ប្រសិនបើត្រូវបានបញ្ជូនទៅវិស័យឯកជន ជាកម្រិតដ៏តូចនៅក្នុងប្រទេសកុម្មុយនីស្តមួយនេះ។

យ៉ាងណាក្ដី លោក Rubio បានព្រមានថា ទណ្ឌកម្មនឹងត្រូវមានឡើងវិញភ្លាមៗ ប្រសិនបើប្រេងធ្លាក់ទៅក្នុងដៃរបស់រដ្ឋាភិបាល ឬយោធា។ ហើយលោក Rubio បានប្រាប់អ្នកសារព័ត៌មានថា៖ «គុយបាត្រូវការការផ្លាស់ប្តូរ។ ប្រទេសនេះត្រូវការផ្លាស់ប្តូរយ៉ាងធំ ពីព្រោះវាជាឱកាសតែមួយគត់ដែលខ្លួនត្រូវតែធ្វើឲ្យប្រសើរឡើងនូវគុណភាពជីវិត សម្រាប់ប្រជាជនរបស់ខ្លួន»៕