ប្រព័ន្ធផ្សព្វផ្សាយរបស់យោធាបាននិយាយកាលពីថ្ងៃពុធ ស្របពេលមានការកើនឡើងនៃការវាយប្រហាររបស់ក្រុមសកម្មប្រយុទ្ធនៅក្នុងប្រទេសនេះថា កងកម្លាំងសន្តិសុខប៉ាគីស្ថាន បានសម្លាប់ជនសកម្មប្រយុទ្ធចំនួន ៣៤នាក់ ក្នុងសប្តាហ៍នេះ នៅក្នុងខេត្តបាឡូជីស្ថានភាគនិរតី និងខេត្ត Khyber Pakhtunkhwa ភាគពាយ័ព្យ ដែលជាប់ព្រំដែនជាមួយអាហ្វហ្គានីស្ថាន។  

នាយកដ្ឋានទំនាក់ទំនងសាធារណៈអន្តរសេវាកម្ម (ISPR) ដែលជាផ្នែកប្រព័ន្ធផ្សព្វផ្សាយរបស់យោធា បាននិយាយថា កងកម្លាំងសន្តិសុខ បានធ្វើប្រតិបត្តិការស៊ើបការណ៍សម្ងាត់ជាបន្តបន្ទាប់ ក្នុងសប្តាហ៍នេះនៅក្នុងខេត្តទាំងពីរ។ នាយកដ្ឋាននេះ បានបញ្ជាក់ថា ជនសកម្មប្រយុទ្ធចំនួន ២៦នាក់ ដែលជាកម្មសិទ្ធិរបស់តាលីបង់ប៉ាគីស្ថាន ឬក្រុម Tehreek-e-Taliban Pakistan (TTP) ត្រូវបានសម្លាប់ ខណៈដែលជន សកម្មប្រយុទ្ធចំនួន ៨ នាក់ ត្រូវបានសម្លាប់ ក្នុងប្រតិបត្តិការនៅក្នុងខេត្តបាឡូជីស្ថាន។

ISPR បាននិយាយថា នៅក្នុងប្រតិបត្តិការប្រឆាំងភេរវកម្មលើកដំបូងកាលពីថ្ងៃអង្គារ កងកម្លាំងប៉ាគីស្ថានបានកំណត់គោលដៅលើជនសកម្មប្រយុទ្ធ TTP ម្នាក់ ដែលកំពុងព្យាយាមចូលប្រទេសនេះ ក្នុងតំបន់ Waziristan ខាងជើង តាមរយៈព្រំដែនប៉ាគីស្ថាន-អាហ្វហ្គានីស្ថាន។ យោធាបានបន្ថែមថា ក្រុមសកម្មប្រយុទ្ធ TTP បីនាក់ ត្រូវបានសម្លាប់ នៅក្នុងប្រតិបត្តិការប្រឆាំងភេរវកម្មលើកទី ២ នៅក្នុងស្រុក Lakki Marwat ។

ISPR បានអះអាងថា នៅក្នុងប្រតិបត្តិការប្រឆាំងភេរវកម្មលើកទី ៣ ជនសកម្មប្រយុទ្ធ TTP ចំនួន ១០ នាក់ ត្រូវបានសម្លាប់ នៅក្នុងស្រុក Bannu ខណៈដែល ១២នាក់ ផ្សេងទៀត ត្រូវបានបាញ់សម្លាប់ នៅ តំបន់ Waziristanខាងជើង ក្នុងប្រតិបត្តិការដាច់ដោយឡែកមួយផ្សេងទៀត៕