មេធាវីការពារក្តីរបស់ប្រធានាធិបតីវ៉េណេស៊ុយអេឡាដែលត្រូវបានទម្លាក់ពីអំណាច បាននិយាយកាលពីថ្ងៃពុធ (ទី២៥ ខែកុម្ភៈ ឆ្នាំ២០២៦) ថា សហរដ្ឋអាមេរិកកំពុងរារាំងរដ្ឋាភិបាលវ៉េណេស៊ុយអេឡាមិនឲ្យបង់ប្រាក់ដល់តំណាងផ្នែកច្បាប់របស់លោក Nicolas Maduro ក្នុងសំណុំរឿងជួញដូរគ្រឿងញៀន ដែលលោកកំពុងប្រឈមជាមួយនៅទីក្រុង New York សហរដ្ឋអាមេរិក។

លោក Maduro និងភរិយារបស់លោក គឺលោកស្រី Cilia Flores បានផ្ដល់ចម្លើយពីភាពមិនមានទោសកាលពីថ្ងៃទី៥ ខែមករា ចំពោះការចោទប្រកាន់ពីបទជួញដូរគ្រឿងញៀន ជាករណីដែលអាចធ្វើឲ្យអ្នកទាំង២ ជាប់ពន្ធនាគារនៅអាមេរិកអស់ជាច្រើនទសវត្សរ៍។ អ្នកទាំង២ ត្រូវបានឃុំឃាំងនៅពន្ធនាគារក្នុងទីក្រុង New York រង់ចាំការកាត់ក្តី។

នៅក្នុងលិខិតមួយផ្ញើទៅកាន់ចៅក្រមប្រចាំតំបន់របស់អាមេរិក លោក Alvin Hellerstein ដែលកំពុងត្រួតពិនិត្យសំណុំរឿងរបស់លោក Maduro មេធាវីការពារក្តី លោក Barry Pollack បានលើកឡើងថា ក្រសួងរតនាគារកាលពីថ្ងៃទី៩ ខែមករា បានផ្តល់ករណីលើកលែង ចំពោះទណ្ឌកម្មហិរញ្ញវត្ថុរបស់សហរដ្ឋអាមេរិកលើវ៉េណេស៊ុយអេឡា ដែលអនុញ្ញាតឲ្យរដ្ឋាភិបាលនៃប្រទេសអាមេរិកខាងត្បូងមួយនេះបង់ថ្លៃសេវានានារបស់លោក Maduro ប៉ុន្តែបានលុបចោលការអនុញ្ញាតនោះវិញ នៅជាច្រើនម៉ោងក្រោយមក ដោយគ្មានការពន្យល់អ្វីឡើយ។

តាមរយៈការរៀបរាប់ដែលបានសរសេរនៅក្នុងលិខិតចុះថ្ងៃទី២០ ខែកុម្ភៈ ប៉ុន្តែបានផ្សព្វផ្សាយជាសាធារណៈនៅថ្ងៃទី២៥ ខែកុម្ភៈ លោក Pollack បានបញ្ជាក់បន្ថែមថា «ច្បាប់ និងការធ្វើតាមទម្លាប់របស់វ៉េណេស៊ុយអេឡា» កំណត់ថា រដ្ឋាភិបាលត្រូវបង់ថ្លៃចំណាយនានារបស់ប្រធានាធិបតី និងស្ត្រីទី១។

អ្នកនាំពាក្យរបស់ការិយាល័យអគ្គរដ្ឋសហរដ្ឋអាមេរិកតំបន់ Manhattan ដែលបានលើកសំណុំរឿងនេះ បានបដិសេធមិនធ្វើអត្ថាធិប្បាយអ្វីឡើយ។ ហើយក្រសួងរតនាគារក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ៕