រដ្ឋាភិបាលស៊ីរីបានរាយការណ៍ថា ផ្ទះជាង ៩៥.០០០ ខ្នង នៅក្នុងខេត្ត Daraa ត្រូវបានខូចខាត ក្នុងអំឡុងពេលសង្គ្រាមស៊ីវិល ដែលក្នុងនោះ ៣៣.៤០០ខ្នង ត្រូវបានបំផ្លាញទាំងស្រុង ដោយកងកម្លាំងនៃរបបបាសា អាសាដ ដែលលែងមានអំណាចហើយនោះ ។

របាយការណ៍នេះ គឺជាផ្នែកមួយនៃការវាយតម្លៃទូទាំងប្រទេសទៅលើការខូចខាតដោយសង្គ្រាម ចាប់ពីឆ្នាំ ២០១១ ដល់ខែធ្នូ ឆ្នាំ ២០២៤ ដែលធ្វើឡើងដោយក្រសួងរដ្ឋបាលមូលដ្ឋាន និងបរិស្ថានស៊ីរី សហការជាមួយកម្មវិធី UN-Habitat។

យោងតាមទីភ្នាក់ងារសារព័ត៌មានអារ៉ាប់ស៊ីរី គំនិតផ្តួចផ្តើមនេះ មានគោលបំណងកត់ត្រាផលប៉ះពាល់នៃសង្គ្រាម ដោយក្រុមបច្ចេកទេសឯកទេសធ្វើការស្ទង់មតិនៅគ្រប់វិស័យ រួមទាំងលំនៅឋាន ការអប់រំ សុខភាព ហេដ្ឋារចនាសម្ព័ន្ធ និងកន្លែងសាធារណៈ និងសាសនា។

នៅក្នុងខេត្ត Daraa ផ្ទះជាង ៦០.០០០ខ្នង បានរងការខូចខាតក្នុងកម្រិតផ្សេងៗគ្នា ហើយផ្ទះដែលនៅសល់ ត្រូវបានបំផ្លាញទាំងស្រុង រួមជាមួយនឹងហាងនំប៉័ងចំនួន ៥៥។ សារព័ត៌មាន SANA បានបន្ថែមថា ការវាយតម្លៃនេះ មានគោលបំណងគាំទ្រផែនការកសាងឡើងវិញរបស់ប្រទេសស៊ីរី និងដើរតួជាឯកសារយោងសម្រាប់អាជ្ញាធរ និងអង្គការដែលពាក់ព័ន្ធនឹងកិច្ចខិតខំប្រឹងប្រែងមនុស្សធម៌ និងអភិវឌ្ឍន៍។  

យោងតាមក្រសួង បានឲ្យដឹងថា ប្រតិបត្តិការស្ទង់មតិដំបូង បានចាប់ផ្តើម នៅក្នុងខែមករា ឆ្នាំ ២០២៥ នៅក្នុងតំបន់ដែលរងការបំផ្លិចបំផ្លាញច្រើនបំផុត ទាំងនៅក្នុងទីក្រុង និងជនបទ៕