លោក Jimmy Lai ដែលជាមហាសេដ្ឋីប្រព័ន្ធផ្សព្វផ្សាយគាំទ្រលទ្ធិប្រជាធិបតេយ្យនៅទីក្រុងហុងកុង បានឈ្នះបណ្តឹងឧទ្ធរណ៍ នៅថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) នេះ ជុំវិញការកាត់ទោសពីបទក្លែងបន្លំ ក្នុងឆ្នាំ២០២២ ដោយសេចក្ដីសម្រេចនេះកើតមានឡើងប៉ុន្មានថ្ងៃបន្ទាប់ពីតុលាការ បានកាត់ទោសឲ្យរូបលោកជាប់ពន្ធនាគារ ជុំវិញបទចោទប្រកាន់សន្តិសុខជាតិដាច់ដោយដោយឡែក។

សេចក្តីសម្រេចនេះ គឺជាជោគជ័យដ៏គួរឲ្យភ្ញាក់ផ្អើលមួយ សម្រាប់លោក Lai វ័យ ៧៨ឆ្នាំ ជាស្ថាបនិកសារព័ត៌មានលែងដំណើរការហើយ គឺ Apple Daily ដែលត្រូវបានកាត់ទោសឲ្យជាប់ពន្ធនាគារ ២០ឆ្នាំ នៅខែកុម្ភៈនេះ ពីបទឃុបឃិត ក្រោមច្បាប់សន្តិសុខជាតិដែលដាក់ដោយទីក្រុងប៉េកាំង។

សំណុំរឿងក្លែងបន្លំនេះបានកើតចេញពីជម្លោះកិច្ចសន្យា ហើយមិនទាក់ទងនឹងការចោទប្រកាន់ដែលលោកបានប្រឈមជាមួយ ក្រោមច្បាប់សន្តិសុខនោះទេ។ លោក Lai មិនបានបង្ហាញខ្លួននៅតុលាការឡើយ ហើយនៅតែជាប់ពន្ធនាគារដដែល។

ប្រធានចៅក្រមតុលាការជាន់ខ្ពស់ លោក Jeremy Poon បាននិយាយថា៖ «(យើង) អនុញ្ញាតឲ្យមានការប្តឹងឧទ្ធរណ៍ លុបចោលការផ្ដន្ទាទោស និងលុបចោលការកាត់ទោស»។ លោក Poon បានបន្ថែមថា លោកបានយល់ព្រមលើពាក្យស្នើរបស់លោក Lai ដែលសុំមិនបង្ហាញខ្លួននៅតុលាការ។

រដ្ឋអាជ្ញាមិនបានឆ្លើយសំណួររបស់អ្នកសារព័ត៌មាន ជុំវិញថា តើអាជ្ញាធរនឹងប្តឹងឧទ្ធរណ៍ដែ ឬអត់។ កាលពីឆ្នាំ២០២២ លោក Lai ត្រូវបានកាត់ទោសឲ្យជាប់ពន្ធនាគាររយៈពេល ៥ឆ្នាំ និង ៩ខែ ពីបទចោទដែលចៅក្រមជំនុំជម្រះ ចាត់ទុកថា ជាគម្រោង «ដែលបានគ្រោងទុក រៀបចំ និងមានរយៈពេលច្រើនឆ្នាំ»៕