ចិនចាត់ទុកដំណើរទស្សនកិច្ចរបស់អធិការបតីអាល្លឺម៉ង់លោក Friedrich Merz ថា ផ្លែផ្កា និងមានអត្ថន័យ ក្នុងនោះអ្នកនាំពាក្យក្រសួងការបរទេសចិនអ្នកស្រី Mao Ning និយាយនៅថ្ងៃព្រហស្បតិ៍នេះថា ភាគីទាំង ២នៅតែប្តេជ្ញាចិត្តចំពោះការរក្សាស្ថិរភាពទំនាក់ទំនង និងកិច្ចសហប្រតិបត្តិការស៊ីជម្រៅជាងមុន ។

ថ្លែងនៅក្នុងសន្និសីទសារព័ត៌មាន អ្នកស្រី Maoនិយាយថា ចិនចាត់ទុកដំណើរទស្សនកិច្ចនេះថាជាឱកាសមួយ ក្នុងការធ្វើការជាមួយអាល្លឺម៉ង់ ដើម្បីបើកជំពូកថ្មី ។

អ្នកស្រីនិយាយទៀតថា ជាថ្មីម្តងទៀត វាបញ្ជាក់ថា ចិន និងអាល្លឺម៉ង់ បានប្តេជ្ញាចិត្តរក្សាស្ថិរភាពទំនាក់ទំនងទ្វេរភាគលក្ខណៈស្ថាបនា ពង្រឹងកិច្ចសហប្រតិបត្តិការអត្ថប្រយោជន៍ឲ្យគ្នាទៅវិញទៅមក និងដោះស្រាយយ៉ាងត្រឹមត្រូវនូវការខ្វែងគំនិតគ្នា តាមរយៈកិច្ចសន្ទនាដោយស្មោះត្រង់ បើកចំហ និងគោរពគ្នាទៅវិញទៅមក ។

 អ្នកស្រីបញ្ជាក់ថា ចិនចង់ឲ្យដំណើរទស្សនកិច្ចនេះក្លាយជាឱកាសធ្វើការជាមួយអាល្លឺម៉ង់ ដើម្បីបើកជំពូកថ្មី នៅក្នុងទំនាក់ទំនងចិន-អាល្លឺម៉ង់ និងនាំស្ថិរភាព និងថាមពលវិជ្ជមាន ចូលទៅក្នុងពិភពលោកដែលពោពេញដោយភាពវឹកវរ ។

សូមបញ្ជាក់ថា លោក Merzត្រូវបានអមដំណើរដោយគណៈប្រតិភូធុរកិច្ចជាច្រើនរូប អំឡុងដំណើរទស្សនកិច្ចលើកដំបូងរបស់លោកមកកាន់ចិន ក្នុងនាមជាអធិការបតីអាល្លឺម៉ង់ ៕