អង្គការ UNICEF ដែលជាទីភ្នាក់ងារកុមាររបស់អង្គការសហប្រជាជាតិ បានសម្តែងការព្រួយបារម្ភចំពោះ របាយការណ៍អំពីការវាយប្រហារតាមអាកាសរបស់យោធាមីយ៉ាន់ម៉ា ក្នុងសប្តាហ៍នេះ ដែលក្រុមឧទ្ទាម និងប្រព័ន្ធផ្សព្វផ្សាយក្នុងស្រុក បាននិយាយថា បានបង្កឲ្យមានជនស៊ីវិលស្លាប់យ៉ាងច្រើន ខណៈដែលសង្គ្រាមស៊ីវិល កំពុងឆាបឆេះ នៅជុំវិញប្រទេសនេះ។ 

សារព័ត៌មាន Myanmar Now និង Irrawaddy បានរាយការណ៍ថា ឧទ្ធម្ភាគចក្រ Paramotors បានទម្លាក់គ្រាប់បែកលើភូមិមួយក្នុងតំបន់ Sagaing ភាគកណ្តាលកាលពីថ្ងៃចន្ទ ហើយយន្តហោះចម្បាំងមួយគ្រឿង បានធ្វើការវាយប្រហារតាមអាកាសនៅក្នុងរដ្ឋ Rakhine ចម្ងាយ ៣២០ គីឡូម៉ែត្រ ទៅភាគខាងលិចនៃឧប្បត្តិហេតុនោះនៅថ្ងៃអង្គារ ដោយបានសម្លាប់មនុស្សយ៉ាងហោចណាស់ ២៤នាក់។  

កងទ័ព Arakan ជាក្រុមឧទ្ទាមដែលកំពុងធ្វើសង្គ្រាមជាមួយរបបយោធានៅរដ្ឋ Rakhine បាននិយាយថា ជនស៊ីវិល ១៧នាក់ ក្នុងមានកុមារផងដែរ ត្រូវបានសម្លាប់ និង ១៤នាក់ រងរបួស នៅពេលដែលយន្តហោះបានទម្លាក់គ្រាប់បែកលើផ្សារនៅក្នុងភូមិដ៏មមាញឹកមួយ។

ទីភ្នាក់ងារសារព័ត៌មានរ៉យទ័រ មិនអាចផ្ទៀងផ្ទាត់របាយការណ៍ដោយឯករាជ្យបានទេ ហើយអ្នកនាំពាក្យរបស់រដ្ឋាភិបាលយោធាមីយ៉ាន់ម៉ា មិនបានឆ្លើយតបទៅនឹងការហៅទូរស័ព្ទដែលស្វែងរកការអត្ថាធិប្បាយនោះទេ។

អង្គការ UNICEF បាននិយាយថា ខ្លួនមានការព្រួយបារម្ភយ៉ាងខ្លាំងចំពោះរបាយការណ៍ទាំងនេះ ហើយបានជំរុញឲ្យគ្រប់ភាគីទាំងអស់នៅក្នុងជម្លោះរបស់មីយ៉ាន់ម៉ា គោរពកាតព្វកិច្ចរបស់ពួកគេ ក្រោមច្បាប់មនុស្សធម៌អន្តរជាតិ៕