​អ៊ុយក្រែន៖ ទូរទស្សន៍​រដ្ឋ​រុស្ស៊ី​កាលពី​ថ្ងៃ​អង្គារ​បាន​ចេញ​ផ្សាយ​វីដេអូ​ដែល​ខ្លួន​បាន​និយាយ​ថា ជា​ការ​បង្ហាញ​ពី​ក្រុម​ផ្ដាច់​ខ្លួន​គាំទ្រ​រុស្ស៊ី​មកពី​តំបន់ Donetsk កំពុង​ប្រយុទ្ធ​គ្នា​នៅ​ក្នុង​ប្រទេស​អ៊ុយ​ក្រែ​ន ព្រម​ទាំង​ការខូចខាត​នៅ​អាកាសយានដ្ឋាន​ក្រុង Mariupol​។​

​ទូរទស្សន៍ RU-RTR បាន​រាយការណ៍​ថា ក្រុម​ផ្ដាច់​ខ្លួន​កំពុង​ស្ថិត​នៅ​ក្នុង​ទីក្រុង Maryinka ក្នុង​តំបន់ Donetsk និង​បាន​បង្ហាញ​ផង​ដែរ​ពី​ទិដ្ឋភាព​នៃ​ការខូចខាត​របស់​អាកាស​យានដ្ឋាន​ទីក្រុង Mariupol ដោយ​អះ​អាង​ថា អាកាសយានដ្ឋាន​មួយ​នេះ​ត្រូវ​បាន​ប្រើ​ជា​បន្ទាយ​ទាហានសម្រាប់​យោធា​អ៊ុយ​ក្រែ​ន​។ យ៉ាងណាក៏ដោយ​ទូរទស្សន៍​នេះ​ពុំបាន​និយាយ​ទេ​ថា​ តើ​វីដេអូ​នេះ​ត្រូវ​បាន​ថត​នៅ​ពេល​ណា​។ ចំណែក​សារព័ត៌មាន​ AP​ មិន​អាច​ស្វែងរក​ការ​បញ្ជាក់​ឲ្យ​បាន​ច្បាស់​លាស់​ពី​របាយការណ៍​នេះ​បានទេ​។ ​កាលពី​ថ្ងៃ​អង្គារ​នោះ​ដែរ ក្រសួងការពារជាតិ​រុស្ស៊ី​បាន​ចែករំលែក​វីដេអូ​នៃ​ការវាយប្រហារ​ដោយ​ឧទ្ធម្ភាគចក្រ Ka-52 របស់​ពួកគេ​នៅ​ក្នុង​ប្រទេស​អ៊ុយ​ក្រែ​ន​។ ប្រធាន​អ្នកនាំពាក្យ​ក្រសួង​នេះ​គឺ​លោក Igor Konashenkov បាន​និយាយ​ថា ការវាយប្រហារ​ដោយ​ប្រើ​ឧទ្ធម្ភាគចក្រ​របស់​រុស្ស៊ី បាន​កម្ទេច​រថក្រោះ​ប្រភេទ BMPs និង APCs ចំនួន​ ៧​គ្រឿង​របស់​អ៊ុយ​ក្រែ​ន​៕

អត្ថបទ៖ សុខមាន