វិមានក្រឹមឡាំង នៅថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) នេះ បានលើកឡើងថា ស្ថានភាពនៅគុយបា កំពុងកាន់តែកានតានតឹង ហើយបានអំពាវនាវឲ្យអត់ធ្មត់ បន្ទាប់ពីកើតឧប្បត្តិហេតុបណ្ដាលឲ្យមានអ្នកស្លាប់ ពាក់ព័ន្ធនឹងទូកល្បឿនលឿនដែលចុះបញ្ជីនៅរដ្ឋ Florida រសប់សហរដ្ឋអាមេរិក នៅម្ដុំឆ្នេរនៃប្រទេសកោះ នៅតំបន់ការ៉ាអ៊ីព។

កងកម្លាំងគុយបា បានសម្លាប់និរទេសជនចំនួន ៤នាក់ និងធ្វើឲ្យរបួស ៦នាក់ផ្សេងទៀត ដែលបានជិះទូកល្បឿនលឿនចូលទៅក្នុងដែនទឹកគុយបា កាលពីថ្ងៃពុធ និងដែលបានបើកការបាញ់ប្រហារលើក្រុមល្បាតគុយបា ជាអ្វីដែលរុស្ស៊ីបានថ្កោលទោសថា ជា «ការញុះញង់ឈ្លានពានដោយសហរដ្ឋអាមេរិក» នៅពេលដែលមានភាពតានតឹងកាន់តែខ្លាំងឡើង ជាមួយទីក្រុងវ៉ាស៊ីនតោន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា រឿងសំខាន់បំផុត គឺការដោះស្រាយតម្រូវការសេដ្ឋកិច្ចសង្គម និងមនុស្សធម៌របស់ប្រជាជនគុយបា។

លោក Peskov បានប្រាប់អ្នកសារព័ត៌មានថា៖ «ស្ថានភាព នៅជុំវិញប្រទេសគុយបា ដូចដែលយើងអាចមើលឃើញ កំពុងតែឡើងកម្តៅ។ រឿងសំខាន់ គឺបញ្ហាមនុស្សធម៌។ បញ្ហាមនុស្សធម៌ទាំងអស់ដែលទាក់ទងនឹងពលរដ្ឋគុយបា ត្រូវតែដោះស្រាយ ហើយគ្មាននរណាម្នាក់គួរបង្កើតឲ្យមានឧបសគ្គនោះទេ»។

អ្នកនាំពាក្យរូបនេះ បានបន្ថែមថា៖ «ចំពោះសន្តិសុខនៅជុំវិញប្រទេសកោះនេះ ជាការពិតណាស់ វាមានសារៈសំខាន់ខ្លាំងណាស់ដែលគ្រប់គ្នា ត្រូវតែបន្តមានភាពអត់ធ្មត់ និងចៀសវាងសកម្មភាពញុះញង់ណាមួយ»៕