ក្រុមមនុស្សប្រុសអាហ្វ្រិកខាងត្បូង ដែលត្រូវបានគេល្បួងឲ្យចូលរួមប្រយុទ្ធជាមួយរុស្ស៊ីនៅអ៊ុយក្រែន បានធ្វើដំណើរមកដល់ប្រទេសកំណើតរបស់ពួកគេវិញហើយកាលពីថ្ងៃពុធ ធ្វើឲ្យវាក្លាយជាការវិលត្រឡប់មកកាន់មាតុភូមិចុងក្រោយគេរបស់ជនជាតិដែលបានទូរស័ព្ទហៅសុំការសង្រ្គោះ ក្រោយពេលជាប់ខ្លួននៅតំបន់ Donbas ។

នៅអាកាសយានដ្ឋានអន្តរជាតិ King Shaka មនុស្សប្រុសទាំងនេះ ត្រូវបានអមដំណើរដោយនគរបាល ពេលពួកគេធ្វើដំណើរមកដល់ ។

នៅក្រៅការិយាល័យនគរបាលអាកាសយានដ្ឋាន ស្ថាបនិកបង្កើតគណបក្ស Mkhonto Wesizwe (MKP)លោក Jabulani Khumalo និយាយប្រាប់ក្រុមអ្នកសារព័ត៌មានថា លោកបានជួយសម្របសម្រួលការវិលត្រឡប់មកវិញរបស់ពួកគេ ។ លោកថា គណបក្ស MKP ពុំបានជាប់ពាក់ព័ន្ធនឹងការជ្រើសរើសបុគ្គលិកណាមួយដែលរងការចោទប្រកាន់នោះទេ ។

ខណៈពេលនោះដែរ អ៊ុយក្រែន បានចោទរុស្ស៊ីពីការប្រើប្រាស់ល្បិច ដើម្បីជ្រើសរើសពលរដ្ឋអាហ្វ្រិកជាង ១.៧០០នាក់ឲ្យចូលរួមក្នុងកិច្ចខិតខំប្រឹងប្រែងសង្គ្រាមរបស់ខ្លួន ខណៈជម្លោះបានអូសបន្លាយពេលដល់ឆ្នាំទី ៥ ។

រដ្ឋមន្ត្រីការបរទេសអ៊ុយក្រែន លោក Andrii Sybiha បានធ្វើការចោទប្រកាន់បែបនេះកាលពីថ្ងៃពុធ អំឡុងសន្និសីទសារព័ត៌មានមួយនៅទីក្រុងគីវជាមួយសមភាគីហ្គាណា លោក Samuel Okudzeto Ablakwa ។ លោកបានចោទទីក្រុងមូស្គូថា បានប្រើប្រាស់ គម្រោងក្លែងបន្លំ ដើម្បីទាក់ទាញអ្នកប្រយុទ្ធបរទេស ។ 

លោក Sybiha និយាយថា ពួកយើងបានឃើញយ៉ាងច្បាស់ថា រុស្ស៊ីកំពុងព្យាយាមអូសទាញពលរដ្ឋអាហ្វ្រិកចូលទៅក្នុងសង្គ្រាមដ៏បង្ហូរឈាម ។ យោងតាមទិន្នន័យរបស់ពួកយើង បច្ចុប្បន្នមានពលរដ្ឋជាង ១.៧៨០នាក់មកពីទ្វីបអាហ្វ្រិកកំពុងប្រយុទ្ធក្នុងជួរកងទ័ពរុស្ស៊ី ៕