បេសកជនទទួលបន្ទុកទណ្ឌកម្មរបស់សហភាពអឺរ៉ុប (EU) លោក David O’Sullivan បាននិយាយនៅថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) នេះថា EU ត្រូវការសម្របសម្រួលផែនការរបស់ខ្លួន ក្នុងការដាក់ចេញនូវការហាមឃាត់សេវាកម្មសមុទ្រទាំងស្រុង លើការនាំចេញប្រេងឆៅតាមសមុទ្ររបស់រុស្ស៊ី ជាមួយបណ្ដាប្រទេសផ្សេងទៀតនៃក្រុមមានឧស្សាហកម្មលូតលាស់ឈានមុខគេទាំង៧ (G7) មុនពេលឆ្ពោះទៅមុខ សម្រាប់វិធានការនេះ។

គណៈកម្មការអឺរ៉ុបបានស្នើឲ្យមានការហាមឃាត់យ៉ាងទូលំទូលាយ លើសេវាកម្មណាមួយ ដែលគាំទ្រដល់ការនាំចេញប្រេងឆៅតាមសមុទ្ររបស់រុស្ស៊ី កាលបីថ្ងៃទី៦ ខែកុម្ភៈ ដែលហួសពីការដាក់ទណ្ឌកម្មរបស់ EU ពីមុនៗ នៅក្នុងកិច្ចប្រឹងប្រែងរបស់ខ្លួន ដើម្បីទប់ស្កាត់ប្រភពចំណូលដ៏សំខាន់របស់ទីក្រុងមូស្គូ ដោយសារសង្គ្រាមរបស់ខ្លួន នៅអ៊ុយក្រែន។

លោក O’Sullivan បាននិយាយថា៖ «ខ្ញុំគិតថា EU បានបង្ហាញយ៉ាងច្បាស់លាស់ណាស់ថា សម្រាប់ពេលនេះ យើងកំពុងអនុវត្តការកំណត់តម្លៃប្រេង ដែលទើបតែត្រូវបានកាត់បន្ថយថ្មីៗនេះ មកត្រឹម ៤៤ដុល្លារអាមេរិក ក្នុងមួយបារ៉ែល។

នៅទីក្រុង Bishkek របស់កៀហ្ស៊ីស៊ីស្ថានដែលជាប្រទេសនៅតំបន់អាស៊ីកណ្តាល លោក O’Sullivan បានប្រាប់សន្និសីទសារព័ត៌មានមួយថា ប្រាក់ចំណូលរបស់រុស្ស៊ីពីប្រេង និងឧស្ម័ន បានធ្លាក់ចុះយ៉ាងខ្លាំងក្នុងរយៈពេលប៉ុន្មានខែថ្មីៗនេះ ហើយយើងនឹងបន្តគោលនយោបាយនោះ។

លោកបានឲ្យដឹងទៀតថា EU គាំទ្រការហាមឃាត់សេវាកម្មផ្លូវសមុទ្រ ប៉ុន្តែត្រូវសម្របសម្រួលជាមួយ G7 មុនពេលធ្វើការសម្រេចចិត្ត ហើយការចរចានឹងត្រូវធ្វើឡើងនៅក្នុងរយៈពេលប៉ុន្មានថ្ងៃខាងមុខ។ អ្នកការទូតរូបនេះបានបន្ថែមថា ក្នុងចំណោមប្រទេស G7 EU មានក្ដីបារម្ភបំផុត ពាក់ព័ន្ធនឹងការគាំទ្ររបស់សហរដ្ឋអាមេរិក ចំពោះវិធានការនេះ៕