ប្រទេសបារាំងបានប្រតិកម្មតបវិញ នៅថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) នេះ ជុំវិញអ្វីដែលខ្លួនចាត់ទុកថា ជាការចោទប្រកាន់គ្មានមូលដ្ឋានរបស់រុស្ស៊ី ដែលថា អ៊ុយក្រែនកំពុងស្វែងរកអាវុធនុយក្លេអ៊ែរ ឬគ្រាប់បែកនុយក្លេអ៊ែរកម្រិតស្រាល ដោយមានជំនួយពីទីក្រុងឡុងដ្រ៍ ឬទីក្រុងប៉ារីស ដោយហៅការលើកឡើងនេះថា ជាឧទាហរណ៍ចុងក្រោយបំផុតនៃការបំភ្លៃព័ត៌មានរបស់រុស្ស៊ី។

នៅក្នុងសេចក្តីថ្លែងការណ៍មួយដែលបានចេញផ្សាយនៅថ្ងៃខួប ៤ឆ្នាំនៃសង្គ្រាម នៅង៊ុយក្រែន សេវាស៊ើបការណ៍សម្ងាត់បរទេស SVR របស់រុស្ស៊ី បានលើកឡើងថា ចក្រភពអង់គ្លេស និងបារាំង ជឿថា អ៊ុយក្រែននឹងអាចទទួលបានលក្ខខណ្ឌអំណោយផលជាងនេះ ប្រសិនបើទីក្រុងគីវមាន «គ្រាប់បែកនុយក្លេអ៊ែរ ឬយ៉ាងហោចណាស់អ្វីដែលហៅថា «គ្រាប់បែកនុយក្លេអ៊ែរកម្រិតស្រាល»»។ ស្ថាប័ននេះមិនរួមបញ្ចូលភស្តុតាងជាឯកសារ ដើម្បីគាំទ្រដល់ការអះអាងរបស់ខ្លួនឡើយ។

នាយកទំនាក់ទំនងនៅក្រសួងការពារជាតិបារាំង លោកស្រី Olivia Penichou បានប្រាប់អ្នកសារព័ត៌មាននៅថ្ងៃព្រហស្បតិ៍នេះថា៖ «សេចក្តីថ្លែងការណ៍គ្មានមូលដ្ឋាននេះពី SVR ត្រូវបានចែករំលែកដោយប្រព័ន្ធផ្សព្វផ្សាយឃោសនារបស់រុស្ស៊ីជាច្រើន នៅលើបណ្ដាញសង្គម X និងដោយទីភ្នាក់ងារសារព័ត៌មានបរទេសមួយចំនួន»។

លោកស្រីបានបន្ថែមថា៖ «សហព័ន្ធរុស្ស៊ីតែងតែងាកទៅរកការបំភ្លៃព័ត៌មាន ដើម្បីជំរុញបរិយាកាសនៃការមិនទុកចិត្ត ចំពោះសកម្មភាពដែលធ្វើឡើងដោយបារាំង និងដៃគូរបស់ខ្លួន ក្នុងការគាំទ្រអ៊ុយក្រែន។ ការប៉ុនប៉ងចុងក្រោយនេះ គឺជាឧទាហរណ៍មិនមានអ្វីត្រូវសង្ស័យឡើយ ចំពោះរឿងនោះ»។

លោកស្រី Penichou បានសង្កត់ធ្ងន់ថា ទីក្រុងប៉ារីសតែងតែគោរពការប្តេជ្ញាចិត្តអន្តរជាតិរបស់ខ្លួន ជាពិសេសការប្តេជ្ញាចិត្តទាក់ទងនឹងសន្ធិសញ្ញា ស្តីពីការមិនរីកសាយភាយអាវុធនុយក្លេអ៊ែរ៕