លោក Hussain Khrais ចងចាំបានយ៉ាងច្បាស់ពីពេលដែលទីក្រុង Khiam របស់លោកស្ថិតនៅភាគខាងត្បូងប្រទេសលីបង់ មាននូវជីវិតដ៏រស់រវើក ជាពិសេសអំឡុងខែតមអាហាររ៉ាម៉ាដន ។

ទោះបីជាយ៉ាងណាក៏ដោយ ជីវិតរស់នៅក្នុងទីក្រុងមួយនេះ ផ្ទុយគ្នាស្រឡះ ខុសពីមុន បន្ទាប់ពីសង្រ្គាមខ្ទេចខ្ទាំរបស់ក្រុមហេសបូឡាជាមួយអ៊ីស្រាអែលកាលពីឆ្នាំ ២០២៤ ។

លោក Hussainវ័យ ៦៦ឆ្នាំ និយាយថា បច្ចុប្បន្នអ្នកឃើញហើយថា អ្វីៗទាំងអស់ខ្ទេចខ្ទីគ្មានសល់នៅទីនេះ តំបន់ទាំងមូលត្រូវបានបំផ្លាញ ។

លោក Khrais ពន្យល់ថា ផ្សារទើបឃើញមានមនុស្សមកវិញបន្តិចម្តងៗ ក្នុងរយៈពេលប៉ុន្មានខែកន្លងមកនេះ ហើយទីតាំងផ្សារបានផ្លាស់ប្តូរ ដោយសារក្តីបារម្ភសុវត្ថិភាព គឺជាការសម្រេចចិត្តធ្វើឡើងដោយសហគមន៍ទីក្រុង Khiam ។

អ៊ីស្រាអែល និងក្រុមហេសបូឡា បានយល់ព្រមបទឈប់បាញ់គាំទ្រដោយសហរដ្ឋអាមេរិក កាលពីឆ្នាំ ២០២៤ ដើម្បីបញ្ចប់សង្រ្គាមរយៈពេលជាង ១ឆ្នាំ ។ ចាប់តាំងពីពេលនោះមក ភាគីទាំង ២ បានដាក់ការស្តីបន្ទោសលើគ្នាទៅវិញទៅមក សម្រាប់ការបំពានបទឈប់បាញ់ ។

បទឈប់បាញ់នេះដែរ បានបញ្ចប់អរិភាពរយៈពេលជាង ១ឆ្នាំ រវាងអ៊ីស្រាអែល និងក្រុមហេសបូឡា ដែលចាប់ផ្តើមជាមួយនឹងការបាញ់គ្រាប់រ៉ុក្កែតលើគោលដៅយោធាអ៊ីស្រាអែលកាលពីឆ្នាំ ២០២៣ ជាការគាំទ្រសម្ព័ន្ធមិត្តហាម៉ាសនៅតំបន់ហ្កាហ្សា ។

អ៊ីស្រាអែលនៅតែបន្តឈានពានកាលពីខែកញ្ញា ឆ្នាំ ២០២៤ ជាមួយនឹងការទម្លាក់គ្រាប់បែកលើតំបន់ភាគខាងត្បូង ភាគខាងកើតប្រទេសលីបង់ និងតំបន់ជាយក្រុងភាគខាងត្បូងទីក្រុងបេរូត ។

ទីក្រុង Khiam ដែលមានចម្ងាយ ៦គ.មប៉ុណ្ណោះពីព្រំដែនជាមួយអ៊ីស្រាអែល បានរងការខ្ទេចខ្ទាំ យ៉ាងធ្ងន់ធ្ងរ ដោយសារការប៉ះទង្គិចគ្នាដ៏តានតឹងរយៈពេលច្រើនសប្តាហ៍ រវាងក្រុមហេសបូឡា និងងកម្លាំងអ៊ីស្រាអែល ៕