​បាល់ទាត់៖ ឯកឧត្តម ខៀវ សា​ម៉េ​ត អនុប្រធាន​សហព័ន្ធ​កីឡាបាល់ទាត់​កម្ពុជា និង​ជា​ប្រធាន​សហព័ន្ធ​កីឡាបាល់ទាត់​អាស៊ីអាគ្នេយ៍ ​(AFF) ត្រូវបាន​សហព័ន្ធ​កីឡាបាល់ទាត់​អាស៊ី​ (AFC) តែងតាំង​ជា​ក្រុមប្រឹក្សាភិបាល​មូលនិធិ AFC Dream Asia ដើម្បី​ជួយ​ដល់​សហគមន៍​ងាយ​រងគ្រោះ​ទូទាំង​អាស៊ី​។ ឯកឧត្តម​បាន​ប្ដេជ្ញា​នឹង​ខំប្រឹង​អស់ពី​លទ្ធភាព ដើម្បី​រួមចំណែក​បំពេញបេសកកម្ម​ដ៏​មាន​សារៈសំខាន់​នេះ។​

AFC បានចេញ​សេចក្ដីប្រកាស​ព័ត៌មានពី​ការតែងតាំង​នេះកាលពីដើម​សប្ដាហ៍​កន្លងទៅ ដោយមាន​បុគ្គល​សំខាន់ៗ ៣​រូបត្រូវ​ដឹកនាំ​មូលនិធិ​នេះគឺ​រយៈពេល ៤​ឆ្នាំចាប់ពី​ឆ្នាំ​២០២១ ដល់​ឆ្នាំ​២០២៥ ពោលគឺ​ក្រៅពី​ឯកឧត្តម ខៀវ សា​ម៉េ​ត រួមមាន​លោក Timothy Fok Tsun Ting ប្រធាន​គណៈកម្មាធិការ​អូឡាំពិក​ហុងកុង និង​ព្រះអង្គម្ចាស់ Abdulaziz Bin Turki Al Faisal ប្រធាន​គណៈកម្មាធិការ​អូឡាំពិក និង​ប៉ា​រ៉ា​ឡាំ​ពិ​ក​ប្រទេស​អា​រ៉ា​ប៊ី​សា​អូឌីត។ ​មន្ដ្រីជាន់ខ្ពស់​សហព័ន្ធ​កីឡាបាល់ទាត់​កម្ពុជាបាន​ឲ្យ​ដឹងថា ការតែងតាំង​នេះគឺ​ទទួលបាន​ការទុកចិត្ត​ពី​លោក Shaikh Salman Bin Ebrahim Al Khalifa ប្រធាន​សហព័ន្ធ​កីឡាបាល់ទាត់​អាស៊ី និង​ជា​ម្ចាស់ជំនួយ ព្រមទាំង​សមាជិក AFC ។ គោលដៅ​សំខាន់​របស់​មូលនិធិ​នេះគឺ​ដើម្បី​ជួយ​ដល់​កុមារ​ទាំងឡាយដែល​ងាយ​រងគ្រោះ ជួយ​ដល់​វិស័យ​អប់រំ និង​អ្នក​គ្មាន​ទីពឹង។​ ​​តាមរយៈ​នេះ ឯកឧត្តម ខៀវ សា​ម៉េ​ត បានចាត់ទុក​តួនាទីនេះគឺជា​ការងារ​មួយ​ដ៏​សំខាន់ ហើយ​ឯកឧត្តម​នឹង​ខំប្រឹង​ឲ្យ​អស់ពី​លទ្ធភាព ដើម្បី​ចូលរួម​ជួយ​សមាជិក​ទាំង ៤៧​ប្រទេស​របស់ AFC៕

​អត្ថបទ៖ លី ឈុន​ឡា