ក្រុមអ្នកស្រាវជ្រាវ បានរកឃើញហ្វូស៊ីលសត្វដាយណូស័រមួយប្រភេទក្នុងចំណោមសត្វដាយណូស័រតូចជាងគេបំផុតរបស់ពិភពលោក នៅតំបន់ Patagonia របស់ប្រទេសអាហ្សង់ទីន ជាទីដែលពពួកសត្វមាឌយក្សទាំងនេះ ដូចជាសត្វដាយណូស័រ Giganotosaurus ទម្ងន់ ៨តោន និងសត្វដាយណូស័រ Argentinosaurus ទម្ងន់ ៧០តោន ធ្លាប់បានរុករានកាលពីរយៈពេល ៩៥លានឆ្នាំមុន ។

ហ្វូស៊ីលរបស់សត្វដាយណូស័រ Alnashetri Cerropoliciensis ដែលមានរហ័សនាមថា “Alna” មានទំហំប៉ុនសត្វក្អែក និងមានទម្ងន់ប្រហែល ០,៧គ.ក ។ គ្រោងឆ្អឹងអភិរក្សបានយ៉ាងល្អនេះ បង្ហាញថា សត្វដាយណូស័រ ប្រហែលជាតាមប្រម៉ាញ់សត្វតូចៗដូចជាសត្វថ្លែន ពស់ ថនិកសត្វ និងសត្វឆ្អឹងខ្នង ។

សត្វដាយណូស័រ Alna គឺជាសត្វដាយណូស័រញីធំធាត់អាយុ ៤ឆ្នាំ ដែលរស់នៅក្នុងបរិស្ថានវាលខ្សាច់ ។ ក្រោយពេលវាងាប់ ខ្លួនរបស់វាត្រូវបានគ្របដណ្តប់ភ្លាមៗដោយដីខ្សាច់ ជាហេតុធ្វើឲ្យហ្វូស៊ីលរបស់វាត្រូវបានអភិរក្សបានយ៉ាងល្អបែបនេះ ។

លោក Alberto Apesteguia គឺជាបុរាណវិទូមួយរូប និយាយថា សត្វដាយណូស័រ Alna គឺជាសត្វដាយណូស័រពេញវ័យ មានមាឌប៉ុនសត្វមាន់ ឬសត្វក្អែក ។

លោកបន្តថា យុគសម័យរបស់សត្វដាយណូស័រ Alna រស់នៅគាប់ជួននឹងអ្វីដែលពួកយើងចាត់ទុកថាជាយុគសម័យសត្វមាឌយក្សភូមិភាគត្បូង ។ សត្វដាយណូស័រ Alna បង្ហាញពួកយើងថា វាមិនមែនជាពេលវេលារបស់ពពួកសត្វដាយណូស័រមាឌយក្សនោះទេ ប៉ុន្តែជាពេលវេលានៃជីវៈចម្រុះដ៏ធំធេង ៕