កិច្ចចរចាដែលមានហានិភ័យខ្ពស់រវាងសហរដ្ឋអាមេរិក និងអ៊ីរ៉ង់ លើអនាគតនៃកម្មវិធីនុយក្លេអ៊ែររបស់ទីក្រុងតេអេរ៉ង់បានបញ្ចប់កាលពីថ្ងៃព្រហស្បតិ៍២៦កុម្ភៈសប្ដាហ៍នេះដោយគ្មានកិច្ចព្រមព្រៀង ខណៈ សេតវិមានកំពុងថ្លឹងថ្លែងពីប្រតិបត្តិការយោធាដែលនឹងក្លាយជាការជ្រៀតជ្រែកដ៏ធំបំផុតរបស់ខ្លួននៅមជ្ឈិមបូព៌ាក្នុងរយៈពេលជាច្រើនទសវត្សរ៍។     

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានអះអាងថា "វឌ្ឍនភាពល្អ" ត្រូវបានធ្វើឡើងក្នុងកិច្ចចរចា ហើយក្រុមអ្នកសម្របសម្រួលអូម៉ង់បានព្យាករណ៍ថាការចរចានឹងរៀបចំជាថ្មីទៀតនៅកម្រិតបច្ចេកទេសនៅសប្តាហ៍ក្រោយក្នុងទីក្រុងវីយែន (Vienna) ប្រទេសអូទ្រីស។  

ប៉ុន្តែមិនមានភស្តុតាងភ្លាមៗដើម្បីគាំទ្រការលើកឡើងថាភាគីទាំងពីរបានខិតជិតគ្នាលើបញ្ហាជាមូលដ្ឋាននៃសិទ្ធិរបស់អ៊ីរ៉ង់ក្នុងការបង្កើនសារធាតុអ៊ុយរ៉ានីញ៉ូម និងអនាគតនៃស្តុកអ៊ុយរ៉ានីញ៉ូមដែលចម្រាញ់ខ្ពស់របស់ខ្លួននោះទេ។

យ៉ាងណាក៏ដោយ ក្រុមអ្នកសម្របសម្រួលអ៊ីរ៉ង់ និងអូម៉ង់ បានព្យាយាមបង្ហាញពីពន្លឺក្នុងកិច្ចចរចានេះ ប្រកបដោយក្ដីសង្ឃឹម ដែលទំនងជាស្វែងរកការជៀសវាងការគំរាមកំហែងរបស់អាមេរិកក្នុងការបើកការវាយប្រហារពីកងនាវាផ្ទុកយន្តហោះ និងនាវាចម្បាំងរបស់ខ្លួនដែលបានប្រមូលផ្តុំក្នុងតំបន់។

លោក Araghchi បានហៅកិច្ចចរចានេះថាជា ការចរចាដ៏រឹងមាំ និងវែងបំផុតមួយរបស់ពួកលោក។ លោកបានបញ្ជាក់ថា ទំនាក់ទំនងបន្ថែមទៀតនឹងកើតឡើងក្នុងរយៈពេលតិចជាងមួយសប្តាហ៍។

កិច្ចពិភាក្សាដោយប្រយោលនៅទីក្រុងហ្សឺណែវត្រូវបានធ្វើឡើងជាពីរវគ្គ ដោយមានរបាយការណ៍ថា ក្រុមសហរដ្ឋអាមេរិកដឹកនាំដោយប្រេសិតពិសេសរបស់លោក Donald Trump ប្រចាំនៅមជ្ឈិមបូព៌ា លោក Steve Witkoff មានការខកចិត្តចំពោះសំណើដែលដាក់ចេញដោយអ៊ីរ៉ង់។

ក្រុមអ្នកតាមដាននិយាយថា កិច្ចពិភាក្សាវគ្គទី២មានរយៈពេលដ៏ខ្លីទំនងជា គ្មានលទ្ធផលល្អទេ៕