ទីភ្នាក់ងារអន្តោប្រវេសន៍អង្គការសហប្រជាជាតិ បាននិយាយថា មនុស្សជិត ៨.០០០នាក់ បានស្លាប់ឬបាត់ខ្លួន កាលពីឆ្នាំមុន នៅលើផ្លូវធ្វើអន្តោប្រវេសន៍ដ៏គ្រោះថ្នាក់ដូចជា ការឆ្លងកាត់សមុទ្រមេឌីទែរ៉ាណេ និងតំបន់ញកអាហ្រ្វិក ប៉ុន្តែចំនួនអ្នកស្លាប់ពិតប្រាកដទំនងជាខ្ពស់ជាងនេះទៅទៀត ដោយសារតែការកាត់បន្ថយថវិកាជំនួយ បានប៉ះពាល់ដល់ដំណើរការមនុស្សធម៌ និងការតាមដានតួលេខអ្នកស្លាប់។

អង្គកាទេសន្តរប្រវេសន៍អន្តរជាតិ IOM បាននិយាយថា ផ្លូវស្របច្បាប់សម្រាប់ការធ្វើអន្តោប្រវេសន៍ កំពុងតែរួមតូច ដែលបានរុញច្រានមនុស្សកាន់តែច្រើនឱ្យធ្លាក់ចូលទៅក្នុងកណ្ដាប់ដៃរបស់អ្នករត់ពន្ធមនុស្ស ខណៈទ្វីបអឺរ៉ុប សហរដ្ឋអាមេរិក និងតំបន់ផ្សេងទៀតបង្កើនការអនុវត្តច្បាប់ និងវិនិយោគយ៉ាងច្រើនលើការទប់ស្កាត់លំហូរអន្តោប្រវេសន៍។

លោកស្រី Amy Pope ប្រធានអង្គការ IOM បាននិយាយក្នុងសេចក្តីថ្លែងការណ៍មួយដែលចេញផ្សាយកាលពីថ្ងៃព្រហស្បតិ៍ (២៦ កុម្ភៈ) ថា៖ «ការបាត់បង់ជីវិតជាបន្តបន្ទាប់នៅលើផ្លូវធ្វើអន្តោប្រវេសន៍ គឺជាបរាជ័យជាសកលដែលមិនអាចទទួលយកបានឡើយ។ ការស្លាប់ទាំងនេះមិនមែនជារឿងដែលបញ្ចៀសមិនរួចនោះទេ។ នៅពេលដែលផ្លូវសុវត្ថិភាពមិនអាចឆ្លងកាត់បាន មនុស្សក៏ត្រូវបង្ខំចិត្តធ្វើដំណើរតាមផ្លូវដ៏គ្រោះថ្នាក់»។

អង្គការ IOM បានឱ្យដឹងថា ការស្លាប់តាមបណ្តោយផ្លូវធ្វើអន្តោប្រវេសន៍មានចំនួន ៧.៦៦៧នាក់ នៅឆ្នាំ២០២៥ ពោលគឺធ្លាក់ចុះពីចំនួនជិត ៩.២០០នាក់ នៅឆ្នាំ២០២៤ ដោយសារតែមនុស្សតិចជាងមុនបានព្យាយាមធ្វើដំណើរដ៏គ្រោះថ្នាក់បែបនេះ ជាពិសេសនៅទូទាំងទ្វីបអាមេរិក ប៉ុន្តែ IOM ព្រមានថា ចំនួនអ្នកស្លាប់ពិតប្រាកដទំនងជាខ្ពស់ជាងនេះទៅទៀត ហើយការធ្លាក់ចុះនេះគ្រាន់តែឆ្លុះបញ្ចាំងពីការថមថយនៃការទទួលបានព័ត៌មាននិងកង្វះថវិកា ដែលរារាំងដល់កិច្ចការតាមដានការស្លាប់ប៉ុណ្ណោះ៕