​វាយ​កូន​បាល់៖ ​កីឡាករ​វាយ​កូន​បាល់​អេ​ស្ប៉ា​ញ Rafael Nadal នឹងត្រូវ​សម្រាកអវត្តមាន​ពី​ការប្រកួត​យ៉ាងហោចណាស់ ៤ ទៅ ៦សប្តាហ៍​ដោយសារ​បញ្ហា​របួស​ត្រគាក​។ ​កីឡាករ​វ័យ ៣៥​ឆ្នាំ​រូបនេះ​បានទទួល​រងរបួស​នេះ​អំឡុង​ការប្រកួត​ដែល​យកឈ្នះ Carlos Alcaraz នៅ​វគ្គ​ពាក់កណ្តាល​ផ្តាច់ព្រ័ត្រ Indians Wells កាលពី​ថ្ងៃ​សៅរ៍​ចុង​សប្តាហ៍​កន្លងទៅ​។

​​ក្រោយមក​ជើងឯក Grand Slam ២១លើក​រូបនេះ​ក៏មាន​បញ្ហា​ពិបាក​ដកដង្ហើម​ទៀត​ នៅ​វគ្គ​ផ្តាច់ព្រ័ត្រ​ដែល​ចាញ់កីឡាករ​អាមេរិក Taylor Fritz​។ ​របួស​នេះ​ធ្វើឱ្យ Nadal នឹង​អវត្តមាន​ពី​ការប្រកួត​លើ​ទីលាន​ដីក្រហម​កម្មវិធី Monte Carlo Masters និង Barcelona Open ខណៈដែល Grand Slam, French Open ខិតជិត​ចូលមក​ដល់​នៅ​ថ្ងៃទី២២ ខែឧសភា​។ ​Nadal ដែល​ធ្លាប់​គ្រង​ជើងឯក French Open ដល់​ទៅ ១៣លើក​ច្រើនជាងគេ​នោះ បាន​យកឈ្នះ​ការប្រកួត ២០ប្រកួត​ជាប់​គ្នា​នៅក្នុង​ឆ្នាំ២០២២ នេះ​រួមទាំង​ឈ្នះ​ពាន Grand Slam, Australian Open មុនពេល​ចាញ់​លើកដំបូង​កាលពី​ថ្ងៃអាទិត្យ​ក្រោម​ស្នាដៃ​កីឡាករ​អាមេរិក Taylor Fritz បាត់បង់​ពាន Indian Wells៕

​អត្ថបទ​៖​នាង សុភា​វុ​ធ