នៅថ្ងៃសុក្រ (២៧ កុម្ភៈ) នេះ កងកម្លាំងប្រដាប់អាវុធហ្វីលីពីន បាននិយាយថា កងទ័ពជើងទឹកហ្វីលីពីន អាមេរិក និងជប៉ុន បានហ្វឹកហាត់រួមគ្នានៅសមុទ្រចិនខាងត្បូង ក្នុងសប្តាហ៍នេះ ដើម្បីបង្កើនកិច្ចសហប្រតិបត្តិការក្នុងចំណោមសម្ព័ន្ធមិត្តយោធា។ របាយការណ៍ប្រព័ន្ធផ្សព្វផ្សាយនិយាយថា ប្រទេសទាំងបីបានបិទបញ្ចប់សមយុទ្ធកងទ័ពជើងទឹករយៈពេលជាច្រើនថ្ងៃរបស់ពួកគេ នៅជិតច្រកសមុទ្របាស៊ី រវាងហ្វីលីពីន និងកោះតៃវ៉ាន់ ដោយពង្រីកសមយុទ្ធនេះហួសពីសមុទ្រចិនខាងត្បូងជាលើកដំបូង។

គេហទំព័រផ្លូវការរបស់បញ្ជាការអាមេរិកនៅប៉ាស៊ីហ្វិក (USPACOM) និយាយថា កងកម្លាំងប្រដាប់អាវុធចម្រុះរបស់ជប៉ុន ហ្វីលីពីន និងអាមេរិក បានធ្វើសមយុទ្ធសហប្រតិបត្តិការផ្លូវសមុទ្រពហុភាគី (MMCA) ក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ចាប់ពីថ្ងៃទី២០ ដល់ទី២៦ ខែកុម្ភៈ ឆ្នាំ២០២៦ នេះ។

មន្រ្តីជាន់ខ្ពស់ហ្វីលីពីន បានប្រាប់ប្រព័ន្ធផ្សព្វផ្សាយថា សមយុទ្ធនេះមានគោលបំណងបង្កើន «សមត្ថភាពអន្តរប្រតិបត្តិការរបស់កងកម្លាំងប្រដាប់អាវុធហ្វីលីពីន ដើម្បីធានាបាននូវតំបន់ឥណ្ឌូ-ប៉ាស៊ីហ្វិក ដ៏សេរី និងបើកចំហ»។

នៅថ្ងៃដដែលនោះ នាវាចម្បាំងកងទ័ពជើងទឹកហ្វីលីពីន Antonio Luna និងនាវាពិឃាត Dewey របស់កងទ័ពជើងទឹកអាមេរិក បានធ្វើសមយុទ្ធ រួមទាំងប្រតិបត្តិការប្រឆាំងនាវាមុជទឹក នៅភាគខាងត្បូងនៃព្រំដែនហ្វីលីពីន ជាមួយច្រកសមុទ្របាស៊ី ដែលជាចំណុចយុទ្ធសាស្ត្រដ៏សំខាន់សម្រាប់ការដឹកជញ្ជូន និងពាណិជ្ជកម្មអន្តរជាតិ ក្នុងករណីមានជម្លោះណាមួយកើតឡើងរវាងតំបន់តៃវ៉ាន់ និងប្រទេសចិន៕