រដ្ឋមន្ត្រីក្រសួងថាមពលសហរដ្ឋអាមេរិក លោក Chris Wright បានប្រាប់អ្នកយកព័ត៌មាននៅរដ្ឋតិចសាស់ កាលពីថ្ងៃព្រហស្បតិ៍ (២៦ កុម្ភៈ) ថា ចំណូលផ្នែកលក់នៅក្រោមកិច្ចព្រមព្រៀងផ្គត់ផ្គង់ប្រេងដ៏សំខាន់រវាងប្រទេសវ៉េណេស៊ុយអេឡា និងសហរដ្ឋអាមេរិក ត្រូវបានរំពឹងថានឹងឈានដល់ ២ពាន់លានដុល្លារ នៅចុងខែកុម្ភៈនេះ។

អាមេរិក បានគ្រប់គ្រងការនាំចេញប្រេងរបស់វ៉េណេស៊ុយអេឡា ដែលជាសមាជិកអង្គការ OPEC មិនយូរប៉ុន្មានបន្ទាប់ពីកងកម្លាំងអាមេរិកចាប់ខ្លួនអតីតមេដឹកនាំរបស់ប្រទេសនេះគឺលោក នីកូឡាស ម៉ាឌូរ៉ូ កាលពីដើមខែមករា ហើយចំណូលទាំងនោះ ត្រូវបញ្ជូនទៅមូលនិធិមួយក្នុងប្រទេសកាតា ដែលត្រួតពិនិត្យដោយអាមេរិក។ ចាប់តាំងពីពេលនោះមក ក្រុមហ៊ុនពាណិជ្ជកម្ម Vitol និង Trafigura បានធ្វើទីផ្សារនិងជួញដូរចំណែកដ៏ធំបំផុតនៃប្រេងវ៉េណេស៊ុយអេឡា ក្រោមកិច្ចព្រមព្រៀងនេះ។

កាលពីដើមខែកុម្ភៈ លោក Wright បានព្យាករថា ការលក់ប្រេងពីវ៉េណេស៊ុយអេឡា នឹងឈានដល់ ៥ពាន់លានដុល្លារ ក្នុងពេលប៉ុន្មានខែប៉ុណ្ណោះ។ កំណើនការនាំចេញ កំពុងបញ្ជូនប្រេងឆៅ និងប្រេងឥន្ធនៈរបស់វ៉េណេស៊ុយអេឡា ត្រឡប់ទៅកាន់ទីផ្សារវិញ បន្ទាប់ពីភាពរអាក់រអួលអស់រយៈពេលជាច្រើនខែ ឬច្រើនឆ្នាំ។

លោក Wright បាននិយាយថា អតិថិជនកាន់តែច្រើននៅអាស៊ី និងអឺរ៉ុប កំពុងចរចាកិច្ចព្រមព្រៀងដើម្បីនាំចូលក្នុងពេលឆាប់ៗនេះ ដោយរំពឹងថា នឹងមានប្រេងចំនួន ៤០ លានបារ៉ែល ត្រូវបានលក់នៅចុងខែកុម្ភៈ ក្នុងតម្លៃប្រហែល ៥០ដុល្លារអាមេរិក ក្នុងមួយបារ៉ែល។ ប្រធានាធិបតីអាមេរិក លោក Donald Trump បាននិយាយថា គោលដៅលក់ដំបូងរបស់កិច្ចព្រមព្រៀងនេះគឺចន្លោះពី ៣០ លានទៅ ៥០ លានបារ៉ែល៕