អ្នកជំនាញបាននិយាយថា រូបភាពកម្ទេចកម្ទីពីការវាយប្រហាររបស់រុស្ស៊ី លើអ៊ុយក្រែន បង្ហាញយ៉ាងច្បាស់ថា ទីក្រុងមូស្គូ បានប្រើមីស៊ីលតម្រង់គោលដៅដ៏ចម្រូងចម្រាសប្រភេទ 9M729 ដែលកាលពីឆ្នាំ២០១៩ វត្តមានមីស៊ីលនេះបាននាំឱ្យលោកប្រធានាធិបតី Donald Trump ចាកចេញពីកតិកាសញ្ញានុយក្លេអ៊ែរដ៏សំខាន់មួយក្នុងអាណត្តិដំបូងរបស់លោក នេះបើយោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

អ្នកជំនាញបានផ្អែកការវិភាគរបស់ពួកគេលើរូបភាពនៃបំណែកមីស៊ីលដែលមានសមត្ថភាពនុយក្លេអ៊ែរមួយនេះ ដែលប្រភពអនុវត្តច្បាប់អ៊ុយក្រែន បានផ្តល់ឱ្យទីភ្នាក់ងារព័ត៌មានរ៉យទ័រ ហើយនោះជាភស្តុតាងច្បាស់ៗដំបូងគេដែលបានចេញផ្សាយរហូតមកដល់បច្ចុប្បន្ននេះ ដែលបញ្ជាក់ថារុស្ស៊ីបានប្រើប្រាស់អាវុធប្រភេទនោះ។

ការវាយប្រហាររាប់សិបដងលើអ៊ុយក្រែន ដោយប្រើមីស៊ីលប្រភេទនេះ គឺជាឧទាហរណ៍ដ៏គួរឱ្យកត់សម្គាល់មួយដែលថា វិធានការគ្រប់គ្រងអាវុធនុយក្លេអ៊ែរដែលកើតចេញពីសង្គ្រាមត្រជាក់ បានដួលរលំបាត់ទៅហើយក្នុងប៉ុន្មានឆ្នាំថ្មីៗនេះ។ នៅខែកុម្ភៈ ឆ្នាំ២០២៦នេះ ពិភពលោកទើបតែបានមើលឃើញការផុតកំណត់នៃសន្ធិសញ្ញានុយក្លេអ៊ែរ New START ចុងក្រោយបង្អស់របស់អាមេរិក និងរុស្ស៊ី ដែលបានដាក់កម្រិតលើអាវុធយុទ្ធសាស្ត្ររបស់មហាអំណាចនុយក្លេអ៊ែរទាំងពីរ។

គួររម្លឹកថា ការអភិវឌ្ឍមីស៊ីល 9M729 របស់រុស្ស៊ី បានជំរុញឱ្យលោក Trump ដកខ្លួនចេញពីសន្ធិសញ្ញាកងកម្លាំងនុយក្លេអ៊ែររយៈចម្ងាយមធ្យម (INF) ដែលជាមូលដ្ឋានគ្រឹះនៃការគ្រប់គ្រងអាវុធនុយក្លេអ៊ែរនៅឆ្នាំ២០១៩ ក្នុងអ្វីដែលលោកបាននិយាយថា ដោយសារតែមីស៊ីលបាញ់ចេញពីដីប្រភេទនេះ អាចហោះលើសពីដែនកំណត់ដែលត្រូវបានអនុញ្ញាត ៥០០គីឡូម៉ែត្រ។

ការិយាល័យរដ្ឋអាជ្ញាអ៊ុយក្រែន បានប្រាប់ទីភ្នាក់ងារព័ត៌មានរ៉យទ័រក្នុងសេចក្តីថ្លែងការណ៍ជាលាយលក្ខណ៍អក្សរមួយកាលពីខែវិច្ឆិកាឆ្នាំមុនថា មីស៊ីល 9M729 មួយគ្រាប់ ដែលបាញ់ដោយរុស្ស៊ី កាលពីថ្ងៃទី៥ ខែតុលា ឆ្នាំ២០២៥ ហោះបានចម្ងាយជាង ១.២០០គីឡូម៉ែត្រ៕