នាយករដ្ឋមន្ត្រីឥណ្ឌា លោក Narendra Modi បាននិយាយកាលពីថ្ងៃព្រហស្បតិ៍ ទី២៦ ខែកុម្ភៈ ថា ឥណ្ឌា និងអ៊ីស្រាអែល បានសន្យាថានឹងប្រយុទ្ធប្រឆាំងអំពើភេរវកម្ម «ដោយធ្វើការជិតស្និតជាមួយគ្នា» ខណៈលោកបានបញ្ចប់ដំណើរទស្សនកិច្ចរយៈពេលពីរថ្ងៃដែលផ្តោតសំខាន់លើការពង្រឹងទំនាក់ទំនងជាយុទ្ធសាស្ត្រ។ ដំណើរទស្សនកិច្ច ដែលបានធ្វើឲ្យមានការរិះគន់នៅក្នុងប្រទេស គឺជាដំណើរទស្សនកិច្ចលើកទីពីររបស់លោក Modi ទៅកាន់ប្រទេសអ៊ីស្រាអែល ក្នុងនាមជានាយករដ្ឋមន្ត្រី ចាប់តាំងពីលោកឡើងកាន់តំណែងក្នុងឆ្នាំ២០១៤។

លោក Modi បាននិយាយដោយឈរនៅក្បែរនាយករដ្ឋមន្ត្រីអ៊ីស្រាអែល លោក Benjamin Netanyahu នៅទីក្រុងយេរូសាឡឹម ថា «ប្រទេសឥណ្ឌា និងអ៊ីស្រាអែល ច្បាស់ណាស់ថា គ្មានកន្លែងសម្រាប់អំពើភេរវកម្មនៅលើពិភពលោកនេះទេ ក្នុងទម្រង់ណាមួយក៏ដោយ យើងនឹងប្រឆាំងនឹងវាដោយធ្វើការជិតស្និតជាមួយគ្នា»។

លោកបាននិយាយបន្ថែមថា «មនុស្សជាតិ មិនត្រូវក្លាយជាជនរងគ្រោះនៃជម្លោះឡើយ»។ លោក Modi ដែលបានថ្លែងទៅកាន់សភាអ៊ីស្រាអែល បាននិយាយអំពីកិច្ចសហប្រតិបត្តិការនាពេលអនាគតរវាងអ៊ីស្រាអែល និងឥណ្ឌា ក្នុងវិស័យជាច្រើន រួមទាំងបច្ចេកវិទ្យា និងថាមពល។

លោក Modi បានប្រាប់អ្នកសារព័ត៌មានថា «រួមគ្នា យើងនឹងឆ្ពោះទៅមុខទៅរកការអភិវឌ្ឍ ការផលិតនិងការផ្ទេរបច្ចេកវិទ្យារួមគ្នា»។ «ក្នុងពេលជាមួយគ្នានេះ យើងក៏នឹងជំរុញកិច្ចសហប្រតិបត្តិការរបស់យើងនៅក្នុងវិស័យដូចជា ថាមពលនុយក្លេអ៊ែរស៊ីវិល និងអវកាសផងដែរ»។