ក្រុមមន្ត្រីអ៊ុយក្រែន និងសហរដ្ឋអាមេរិក បានជួបគ្នានៅទីក្រុងហ្សឺណែវ កាលពីថ្ងៃព្រហស្បតិ៍ (២៦ កុម្ភៈ) សម្រាប់កិច្ចពិភាក្សាស្តីពីការកសាងឡើងវិញក្រោយសង្គ្រាម ទោះបីជាមានភាពជាប់គាំងក្នុងការចរចាសន្តិភាពជាមួយរុស្ស៊ី ហើយសមរភូមិនៅតែក្ដៅគគុកក៏ដោយ ខណៈមន្ត្រីនៅទីក្រុងគីវសង្ឃឹមថា នឹងអាចបញ្ចប់ចុងក្រោយនូវព័ត៌មានលម្អិតសំខាន់ៗអំពីដំណោះស្រាយសន្តិភាព នៅក្នុងកិច្ចប្រជុំត្រីភាគីនៅដើមខែក្រោយនេះ។

លោកប្រធានាធិបតីអ៊ុយក្រែន Volodymyr Zelenskyy ដែលបានពិភាក្សាតាមទូរសព្ទជាមួយប្រធានាធិបតីអាមេរិក Donald Trump កាលពីថ្ងៃពុធ បាននិយាយថា កិច្ចចរចាត្រីភាគីទំនងជានឹងធ្វើឡើងនៅទីក្រុងអាប៊ូដាប៊ី នៅដើមខែមីនា ហើយជំនួបនោះនឹងមានគោលបំណងក្រាលផ្លូវសម្រាប់កិច្ចប្រជុំរវាងមេដឹកនាំអ៊ុយក្រែន និងរុស្ស៊ី។

ទីក្រុងគីវសង្ឃឹមថានឹងទាក់ទាញមូលនិធិសាធារណៈ និងឯកជនប្រហែល ៨០០ពាន់លានដុល្លារ ក្នុងពេល ១០ឆ្នាំខាងមុខ ដើម្បីកសាងប្រទេសឡើងវិញ ជាទីដែលទឹកដីភាគច្រើនត្រូវបានបំផ្លិចបំផ្លាញ។ ការវាយតម្លៃចុងក្រោយបំផុតពីធនាគារពិភពលោក ចេញផ្សាយកាលពីថ្ងៃចន្ទសប្ដាហ៍នេះ បានបង្ហាញថា ការកសាងសេដ្ឋកិច្ចអ៊ុយក្រែនឡើងវិញ នឹងត្រូវចំណាយអស់ប្រមាណ ៥៨៨ ពាន់លានដុល្លារ។

ការស្ថាបនាអ៊ុយក្រែនឡើងវិញ បន្ទាប់ពីការបំផ្លិចបំផ្លាញដែលបង្កឡើងដោយការវាយប្រហារតាមអាកាសរបស់រុស្ស៊ី និងការប្រយុទ្ធគ្នានៅជួរមុខ បានក្លាយជាធាតុសំខាន់មួយក្នុងការចរចាដ៏ទូលំទូលាយ ដែលសម្របសម្រួលដោយសហរដ្ឋអាមេរិក ស្តីពីការបញ្ចប់សង្គ្រាម ខណៈជម្លោះនេះបានចូលដល់ឆ្នាំទីប្រាំរបស់ខ្លួនហើយនៅសប្តាហ៍នេះ ហើយមិនបង្ហាញសញ្ញានៃការថមថយនោះទេ៕