ដាណឺម៉ាក៖ លោកស្រីនាយករដ្ឋមន្ត្រីដាណឺម៉ាក Mette Frederiksen បាននិយាយកាលពីថ្ងៃអង្គារថា ជនភៀសខ្លួនអ៊ុយក្រែននឹងមិនត្រូវបានធ្វើសមាហរណកម្មចូលក្នុងសង្គមរបស់ដាណឺម៉ាកទេ ហើយគួរតែជំនួសមកវិញដោយការវិលត្រឡប់ទៅកសាងប្រទេសអ៊ុយក្រែនវិញ បន្ទាប់ពីជម្លោះបញ្ចប់។
សេចក្ដីថ្លែងការណ៍របស់លោកស្រីកើតឡើង មួយសប្ដាហ៍បន្ទាប់ពីប្រទេសនេះបានអនុម័តច្បាប់ពិសេសមួយ ដោយផ្ដល់សិទ្ធិឲ្យជនភៀសខ្លួនអ៊ុយក្រែនទទួលបានឱកាសការងារ និងការអប់រំក្នុងប្រទេសជាសមាជិកសហភាពអឺរ៉ុបមួយនេះ។ យោងតាមសារព័ត៌មាន AP ថ្លែងអំឡុងការជជែកដេញដោលនៅសភា លោកស្រីនាយករដ្ឋមន្ត្រី Frederiksen បាននិយាយថា ពាក្យថាជនភៀសខ្លួនមានន័យថា គឺជាផ្ដល់សិទ្ធិឲ្យស្នាក់បណ្ដោះអាសន្ន ដូច្នេះអ្នកត្រូវតែត្រឡប់ទៅវិញ និងជួយកសាងប្រទេសកំណើតរបស់អ្នកនៅពេលអ្នកទទួលបានឱកាស។ ការធ្វើបែបនេះនឹងផ្ដល់ឱកាសឲ្យយើងជួយជនភៀសខ្លួនដទៃទៀត។
សភារបស់ប្រទេសដាណឺម៉ាកបានអនុម័តច្បាប់កាលពីថ្ងៃព្រហស្បតិ៍សប្តាហ៍មុន ដែលផ្តល់ការអនុញ្ញាតឱ្យស្នាក់នៅរយៈពេលពីរឆ្នាំដល់ជនភៀសខ្លួនអ៊ុយក្រែន ជាមួយនឹងជម្រើសដើម្បីបន្តរយៈពេលមួយឆ្នាំបន្ថែមទៀត។ ច្បាប់នេះក៏ផ្តល់សិទ្ធិឱ្យជនភៀសខ្លួនទទួលបានប័ណ្ណអនុញ្ញាតឲ្យទទួលបានការងារ ការអប់រំ និងសុខុមាលភាពសង្គមផងដែរ។ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបាននិយាយថា មនុស្ស ១០លាននាក់ឥឡូវនេះបានភៀសខ្លួនទាំងនៅក្នុង និងខាងក្រៅប្រទេសអ៊ុយក្រែនដោយសារតែការវាយលុករបស់រុស្ស៊ី។ ប្រជាជនចំនួន ៣.៥លាននាក់ភៀសខ្លួនចេញពីប្រទេសកំណើតទៅកាន់ប្រទេសជិតខាង ហើយមនុស្សប្រមាណ ៦.៥លាននាក់ផ្សេងទៀតត្រូវគេគិតថា ត្រូវបានផ្លាស់ទីលំនៅនៅក្នុងប្រទេសដែលហែកហួរដោយសង្គ្រាមមួយនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
