យោធារបស់ប្រទេសចិន បាននិយាយនៅថ្ងៃសុក្រ (២៧ កុម្ភៈ) នេះថា ខ្លួនបានអនុវត្តប្រតិបត្តិការល្បាតជាប្រចាំនៅសមុទ្រចិនខាងត្បូង ចាប់ពីថ្ងៃទី២៣ ដល់ថ្ងៃទី២៦ ខែកុម្ភៈ ក្នុងសប្ដាហ៍នេះ ហើយបានចោទប្រកាន់ហ្វីលីពីនថា «រំខាន» ដល់សន្តិភាព និងស្ថិរភាព ដោយការរៀបចំប្រតិបត្តិការល្បាតរួមគ្នាជាមួយប្រទេសនានានៅខាងក្រៅតំបន់។

អ្នកនាំពាក្យយោធាចិន លោក Zhai Shichen បាននិយាយនៅក្នុងសេចក្តីថ្លែងការណ៍មួយថា បញ្ជាការភាគខាងត្បូងរបស់យោធាចិន នឹង «ការពារយ៉ាងម៉ឺងម៉ាត់នូវអធិបតេយ្យភាពទឹកដី សិទ្ធិ និងផលប្រយោជន៍ដែនសមុទ្ររបស់ប្រទេសចិន ព្រមទាំងរក្សាយ៉ាងមុតមាំនូវសន្តិភាព និងស្ថិរភាពក្នុងតំបន់»។

នៅថ្ងៃសុក្រដដែលនេះ កងកម្លាំងប្រដាប់អាវុធហ្វីលីពីន ទើបតែបានប្រកាសថា កងទ័ពជើងទឹកហ្វីលីពីន សហរដ្ឋអាមេរិក និងជប៉ុន បានហ្វឹកហាត់រួមគ្នានៅសមុទ្រចិនខាងត្បូង នៅក្នុងសប្តាហ៍នេះ ដើម្បីបង្កើនកិច្ចសហប្រតិបត្តិការក្នុងចំណោមសម្ព័ន្ធមិត្តយោធា។

ចិន និងហ្វីលីពីន បានប៉ះទង្គិចគ្នាម្តងហើយម្តងទៀតជុំវិញដែនទឹកដ៏ចម្រូងចម្រាសនៅសមុទ្រចិនខាងត្បូង ដែលចិន អះអាងសិទ្ធិស្ទើរតែទាំងស្រុង។ ប្រទេសទាំងពីរស្ថិតក្នុងចំណោមប្រទេសមួយចំនួនផ្សេងទៀត ដែលក៏ប្រជែងគ្នាអះអាងសិទ្ធិនៅក្នុងដែនទឹកនេះ ដែលជាផ្លូវទឹកមានសារៈសំខាន់ជាយុទ្ធសាស្ត្រ និងជាកន្លែងសម្រាប់ការនេសាទដ៏មានតម្លៃ៕