វេជ្ជបណ្ឌិតមួយក្រុម បាននិយាយកាលពីថ្ងៃព្រហស្បតិ៍ថា ការវាយប្រហារដ៏សាហាវដោយកងកម្លាំងប៉ារ៉ាយោធាស៊ូដង់ទៅលើទីក្រុងមួយក្នុងតំបន់ Darfur ភាគខាងលិចរបស់ប្រទេសនេះ បានធ្វើឲ្យមនុស្សជាង ៣.000នាក់ ផ្លាស់ទីលំនៅ ក្នុងរយៈពេលប៉ុន្មានថ្ងៃកន្លងមកនេះ ខណៈដែលសង្គ្រាមនៅក្នុងប្រទេស       អាហ្វ្រិកនេះ ជិតដល់បីឆ្នាំរបស់ខ្លួន ដោយគ្មានទីបញ្ចប់។

សេចក្តីថ្លែងការណ៍ពីបណ្តាញវេជ្ជបណ្ឌិតស៊ូដង់ ដែលតាមដានសង្គ្រាមដ៏ឃោរឃៅនៅក្នុងប្រទេសនេះ បានធ្វើឡើង បន្ទាប់ពីសេចក្តីថ្លែងការណ៍មួយកាលពីដើមសប្តាហ៍នេះ នៅលើហ្វេសប៊ុក ដែលក្រុមនេះបាននិយាយថា ការវាយប្រហារចុងក្រោយបំផុតលើទីក្រុង Misteriha នៅក្នុងខេត្ត Darfur ខាងជើង បានបណ្តាលឲ្យមនុស្សយ៉ាងហោចណាស់ ២៨នាក់ ស្លាប់ និង ៣៩នាក់ រងរបួស។

ក្រុមនេះបាននិយាយនៅពេលនោះថា ចំនួនអ្នកស្លាប់ គឺជាការរកឃើញដំបូង ហើយចំនួនពិតប្រាកដនៃអ្នកស្លាប់ និងរងរបួស ទំនងជាខ្ពស់ជាងនេះ។

ទីក្រុងនេះ គឺជាបន្ទាយរបស់មេដឹកនាំកុលសម្ព័ន្ធអារ៉ាប់ លោកមូសា ហ៊ីឡាល (Musa Hilal) ដែលមកពីកុលសម្ព័ន្ធអារ៉ាប់រីហ្សេហ្គាត (Rizeigat) ក៏ដូចជាកងកម្លាំងគាំទ្ររហ័ស (RSF) ភាគច្រើនក៏ដោយ ក៏លោកបានសម្តែងការគាំទ្រដល់រដ្ឋាភិបាលស៊ូដង់។ មូលហេតុនៃការវាយប្រហារនេះ មិនត្រូវបានគេដឹងនោះទេ ហើយ RSF មិនអាចទាក់ទងសុំការអត្ថាធិប្បាយបានទេ។

យោងតាមអង្គការសុខភាពពិភពលោក ជម្លោះរវាងកងកម្លាំងគ្រាំទ្ររហ័ស និងយោធាស៊ូដង់ បានផ្ទុះឡើងជាសង្គ្រាម នៅក្នុងខែមេសា ឆ្នាំ ២០២៣ ដែលរហូតមកដល់ពេលនេះ បានសម្លាប់មនុស្សយ៉ាងហោចណាស់ ៤០.០០០នាក់ និង មនុស្ស ១២លាននាក់ ត្រូវផ្លាស់ទីលំនៅ។ ក្រុមជំនួយនិយាយថា ចំនួនអ្នកស្លាប់ពិតប្រាកដ អាចខ្ពស់ជាងនេះច្រើនដង ដោយសារការប្រយុទ្ធគ្នានៅតំបន់ដាច់ស្រយាល និងធំទូលាយមួយចំនួនរារាំងមិនឲ្យចូលទៅដល់៕