អាជ្ញាធរប្រេស៊ីល បាននិយាយថា ការខូចខាត និងការរំខានជាច្រើនបានកើតមានឡើងនៅរដ្ឋ Minas Gerais កាលថ្ងៃព្រហស្បតិ៍ (២៦ កុម្ភៈ) បន្ទាប់ពីភ្លៀងធ្លាក់ខ្លាំងបន្ថែមទៀតកាលពីយប់ថ្ងៃពុធ បានបន្តវាយប្រហារតំបន់នេះ ខណៈដែលចំនួនអ្នកស្លាប់ដោយសារទឹកជំនន់ និងគ្រោះមហន្តរាយបំណាក់ដីនាពេលថ្មីៗនេះ បានកើនឡើងដល់ ៥៩នាក់។

ក្រុមអ្នកជួយសង្គ្រោះបានបន្តស្វែងរកជនរងគ្រោះ ចាប់តាំងពីគ្រោះមហន្តរាយបានចាប់ផ្តើមនៅល្ងាចថ្ងៃចន្ទសប្ដាហ៍នេះ ដែលបណ្តាលឱ្យមានទឹកជំនន់ បំណាក់ដី ធ្វើឱ្យផ្ទះសម្បែងដួលរលំ និងបង្ខំឱ្យសាលារៀនត្រូវបានបិទទ្វារ។ នាយកដ្ឋានពន្លត់អគ្គិភ័យរបស់រដ្ឋ បាននិយាយថា មនុស្ស ១៥ នាក់នៅតែបាត់ខ្លួន ហើយមនុស្សជាង ៥.៥០០ នាក់ត្រូវបានបង្ខំឱ្យជម្លៀសចេញពីផ្ទះសម្បែងរបស់ពួកគេ។

វិទ្យាស្ថានឧតុនិយមប្រេស៊ីល Inmet បានព្យាករនៅព្រឹកថ្ងៃព្រហស្បតិ៍ថា នឹងមានភ្លៀងធ្លាក់កាន់តែខ្លាំងបន្ថែមទៀត រួមជាមួយនឹងខ្យល់កន្រ្តាក់ ហើយបានព្រមានពីហានិភ័យនៃការដាច់ចរន្តអគ្គិសនី មែកឈើបាក់រលំ ទឹកជំនន់ និងរន្ទះបាញ់ ដែលអាចឆក់យកអាយុជីវិតប្រជាជន។

អ្នកវិទ្យាសាស្ត្រនិយាយថា អាកាសធាតុអាក្រក់កំពុងកើតឡើងញឹកញាប់ជាងមុននៅទូទាំងពិភពលោក ដោយសារតែបម្រែបម្រួលអាកាសធាតុដែលបង្កឡើងដោយមនុស្ស។ គ្រោះធម្មជាតិដ៏កំណាចបែបនេះ មិនមែនជាលើកទីមួយទេសម្រាប់ប្រេស៊ីល ដោយកាលពីខែឧសភា ឆ្នាំ២០២៤ ទឹកជំនន់ដ៏ធំនៅភាគខាងត្បូងរដ្ឋ Rio Grande do Sul បានសម្លាប់មនុស្សយ៉ាងតិច ១៨៥នាក់ និងបំផ្លាញស្ទើរតែគ្រប់យ៉ាងដែលត្រូវការសម្រាប់សកម្មភាពសេដ្ឋកិច្ច ជាមួយនឹងការខាតបង់ផ្នែកហិរញ្ញវត្ថុមានចំនួនលើសពី ១,៩ ពាន់លានដុល្លារអាមេរិក៕