យោងតាមសេចក្តីថ្លែងការណ៍ពីការិយាល័យនាយករដ្ឋមន្ត្រីបានឲ្យដឹងថា នាយករដ្ឋមន្ត្រីប្រទេសប៉ាគីស្ថាន លោក Shehbaz Sharif បាននិយាយនៅព្រឹកថ្ងៃសុក្រនេះថា កងកម្លាំងប្រដាប់អាវុធរបស់ប្រទេសលោក មានសមត្ថភាពពេញលេញក្នុងការកំទេចមហិច្ឆតាឈ្លានពានណាមួយ ហើយសកម្មភាពឈ្លានពានណាមួយនឹងត្រូវបានឆ្លើយតបយ៉ាងដាច់ខាត។

លោកនាយករដ្ឋមន្ត្រីនិយាយថា «ប្រជាជនប៉ាគីស្ថាន និងកងកម្លាំងប្រដាប់អាវុធ តែងតែត្រៀមរួចជាស្រេចដើម្បីការពារសន្តិសុខ អធិបតេយ្យភាព និងបូរណភាពទឹកដីរបស់ប្រទេស»។ លោក Sharif បាននិយាយបន្ថែមថា កងកម្លាំងប្រដាប់អាវុធប៉ាគីស្ថានត្រូវបានបំពាក់ដោយជំនាញវិជ្ជាជីវៈ ការបណ្តុះបណ្តាលកម្រិតខ្ពស់ និងយុទ្ធសាស្ត្រការពារជាតិដ៏មានប្រសិទ្ធភាព ហើយមានសមត្ថភាពពេញលេញក្នុងការដោះស្រាយជាមួយនឹងបញ្ហាប្រឈមខាងក្នុង ឬពីខាងក្រៅណាមួយ។

លោក Shehbaz និយាយថា «ប៉ាគីស្ថាន តែងតែជំរុញសន្តិភាព។ ទោះជាយ៉ាងណា ប្រទេសនេះនឹងមិនអនុញ្ញាតឱ្យមានផលប៉ះពាល់ណាមួយដល់បូរណភាពទឹកដីរបស់ខ្លួនឡើយ» ហើយប្រទេសទាំងមូលឈររួបរួមគ្នាជិតស្និតជាមួយកងកម្លាំងប្រដាប់អាវុធប៉ាគីស្ថាន។

ប្រភពសន្តិសុខបាននិយាយថា ប៉ាគីស្ថានបានបើកការវាយប្រហារតាមអាកាសលើទីតាំងក្រុមតាលីបង់អាហ្វហ្គានីស្ថាន ដោយបានបំផ្លាញគោលដៅសំខាន់ៗ រួមមានទាំងឃ្លាំងគ្រាប់រំសេវ កងពលធំអាហ្វហ្គានីស្ថានចំនួនបីកន្លែង និងទីបញ្ជាការកណ្តាលក្នុងតំបន់ផ្សេងៗគ្នានៅប្រទេសអាហ្វហ្គានីស្ថាន។