ការិយាល័យប្រព័ន្ធផ្សព្វផ្សាយ Sweida របស់រដ្ឋាភិបាលស៊ីរី បាននិយាយថា រដ្ឋាភិបាលស៊ីរី និងក្រុម សហគមន៍ Druze ដែលគ្រប់គ្រងនៅទីក្រុង Sweida ភាគខាងត្បូង បានធ្វើការដោះដូរអ្នកទោសជាលើកដំបូងរបស់ខ្លួនកាលពីថ្ងៃព្រហស្បតិ៍ ទី២៦ ខែកុម្ភៈ ចាប់តាំងពីការប៉ះទង្គិចគ្នាដ៏បង្ហូរឈាមរវាងនិកាយ កាលពីរដូវក្តៅមុន។

មនុស្សរាប់រយនាក់ត្រូវបានសម្លាប់ក្នុងរយៈពេលប៉ុន្មានថ្ងៃនៃការបង្ហូរឈាមកាលពីក្នុងខែកក្កដា មុនពេលបទឈប់បាញ់ បានបញ្ឈប់ការប្រយុទ្ធ។ ក្រុង Sweida មានប្រជាជនរស់នៅច្រើនដោយសហគមន៍ Druze ជាសាខានៅឆ្ងាយមួយរបស់សាសនាអ៊ីស្លាម ដែលនៅតែស្ថិតក្រៅការគ្រប់គ្រងរបស់រដ្ឋាភិបាល។

ប្រទេសស៊ីរី ត្រូវបានញាំញីដោយជម្លោះនិកាយ ចាប់តាំងពីការដួលរលំភ្លាមៗរបបប្រធានាធិបតី លោក Bashar al-Assad ក្នុងខែធ្នូ ឆ្នាំ ២០២៤ បន្ទាប់ពីសង្គ្រាមស៊ីវិលរយៈពេល១៤ឆ្នាំ។

ការដោះដូរអ្នកទោសកាលពីថ្ងៃព្រហស្បតិ៍ពាក់ព័ន្ធនឹងការដោះលែងអ្នកទោសចំនួន៦១នាក់មកពីក្រុម សហគមន៍ Druze ដែលត្រូវបានឃុំខ្លួននៅក្នុងពន្ធនាគារ Adra Central ជិតរដ្ឋធានី ជាថ្នូរនឹងកងកម្លាំងឆ្មាំជាតិ Druze ដោះលែងបុគ្គលិករដ្ឋាភិបាលស៊ីរីចំនួន២៥នាក់ នេះបើយោងតាមការិយាល័យប្រព័ន្ធផ្សព្វផ្សាយ។ ប្រតិបត្តិការនេះត្រូវបានអនុវត្តដោយគណៈកម្មាធិការកាកបាទក្រហមអន្តរជាតិ។