រដ្ឋមន្ត្រីការបរទេស Abbas Araghchi បាននិយាយបន្ទាប់ពីការពិគ្រោះយោបល់នៅទីក្រុងហ្សឺណែវថា     អ៊ីរ៉ង់មានគម្រោងពិភាក្សាអំពីទណ្ឌកម្មលម្អិត អំឡុងពេលកិច្ចពិភាក្សាដោយប្រយោលជុំបន្ទាប់ជាមួយសហរដ្ឋអាមេរិកលើបញ្ហានុយក្លេអ៊ែរ។  

ទូរទស្សន៍ Al Alam បានដកស្រង់សម្តីរបស់លោកដែលបាននិយាយថា៖«យើងបានសម្រេចចិត្តពិភាក្សាអំពីបញ្ហាទណ្ឌកម្ម ក្នុងអំឡុងពេលនៃជុំបន្ទាប់ ដោយផ្តោតលើព័ត៌មានលម្អិតជាក់លាក់»។ លោកAraghchi បានកត់សម្គាល់ថា ក្នុងអំឡុងពេលពិគ្រោះយោបល់កាលពីថ្ងៃព្រហស្បតិ៍ គណៈប្រតិភូអ៊ីរ៉ង់ «បានបញ្ជាក់ជំហររបស់ខ្លួនយ៉ាងច្បាស់» លើបញ្ហានេះ។

កាលពីថ្ងៃព្រហស្បតិ៍ កិច្ចពិភាក្សាដោយប្រយោលជុំទី ៣ រវាងអ៊ីរ៉ង់ និងសហរដ្ឋអាមេរិកលើកម្មវិធីនុយក្លេអ៊ែរអ៊ីរ៉ង់ ដែលសម្របសម្រួលដោយប្រទេសអូម៉ង់ បានបញ្ចប់នៅទីក្រុងហ្សឺណែវ។ ភាគីទាំងអស់ បានយល់ព្រមបន្តការពិភាក្សា បន្ទាប់ពីពិគ្រោះយោបល់ជាមួយថ្នាក់ដឹកនាំនៃប្រទេសរបស់ពួកគេ៕