មន្ត្រីគណបក្សមួយរូប បាននិយាយនៅថ្ងៃសុក្រនេះថា គណបក្សកាន់អំណាចរបស់នាយករដ្ឋមន្ត្រីជប៉ុន លោកស្រី Sanae Takaichi បានអនុម័តផែនការ ដើម្បីបង្កើនសមត្ថភាពស៊ើបការណ៍សម្ងាត់របស់ប្រទេសនេះ ខណៈដែលលោកស្រីនាយករដ្ឋមន្ត្រី កំពុងជំរុញការកែទម្រង់វិស័យការពារជាតិ។

លោកស្រី Takaichi ដែលទើបទទួលបានអំណាចថ្មី បន្ទាប់ពីទទួលបានជ័យជម្នះយ៉ាងភ្លូកទឹកភ្លូកដី ក្នុងការបោះឆ្នោតមុនអាណត្តិ នៅខែនេះ បានសន្យាថា នឹងធ្វើឲ្យប្រទេសជប៉ុន «រឹងមាំ និងរីកចម្រើន» តាម  រយៈការផ្លាស់ប្តូរគោលនយោបាយសំខាន់ៗ រួមទាំងវិស័យការពារជាតិ និងស៊ើបការណ៍សម្ងាត់។

ផែនការទាំងនេះ បានកើតឡើង នៅពេលដែលជម្លោះការទូតរយៈពេលជាច្រើនខែ រវាងជប៉ុន និងចិន ជុំវិញការអត្ថាធិប្បាយរបស់លោកស្រី Takaichi អំពីកោះតៃវ៉ាន់ នៅតែបន្ត។

មន្ត្រីម្នាក់របស់គណបក្សប្រជាធិបតេយ្យសេរី (LDP) បានប្រាប់សារព័ត៌មាន AFPថា សំណើនេះ ដែលត្រូវបានអនុម័តដោយទីស្នាក់ការកណ្តាលយុទ្ធសាស្ត្រស៊ើបការណ៍សម្ងាត់របស់គណបក្សនេះ រួមមានការបង្កើតការិយាល័យស៊ើបការណ៍សម្ងាត់ ដែលបានធ្វើឲ្យប្រសើរឡើង និងពង្រឹង «សមត្ថភាពប្រមូលព័ត៌មានសម្ងាត់បរទេស»។  

សំណើនេះ អំពាវនាវឲ្យមានប្រព័ន្ធចុះឈ្មោះជាកាតព្វកិច្ចសម្រាប់ភ្នាក់ងារបរទេស ដូចជាបុគ្គល និងសាជីវកម្មដែលកំពុងធ្វើការតស៊ូមតិនៅក្នុងប្រទេសជប៉ុន ក្នុងនាមរដ្ឋាភិបាលផ្សេងទៀត ជាផ្នែកមួយនៃវិធានការប្រឆាំងព័ត៌មានចារកម្ម។

កាសែត Asahi Shimbun និងប្រព័ន្ធផ្សព្វផ្សាយក្នុងស្រុកផ្សេងទៀត បានរាយការណ៍ថា ផែនការនេះ ដែលក៏រួមបញ្ចូលទាំងការហាមឃាត់ការប្រើប្រាស់ទូរស័ព្ទចល័តនៅក្នុងអគាររដ្ឋាភិបាលសំខាន់ៗផងដែរ ត្រូវបានគេរំពឹងថា នឹងត្រូវបានដាក់ជូនទៅលោកស្រី Takaichi នៅសប្តាហ៍ក្រោយ៕