អ្នកនាំពាក្យរបស់លោក Antonio Guterres កាលពីថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) បាននិយាយថា លោកអគ្គលេខាធិការអង្គការសហប្រជាជាតិ (UN) បានសម្តែងក្ដីបារម្ភ ចំពោះរបាយការណ៍ អំពីការប៉ះទង្គិចគ្នាឆ្លងព្រំដែន រវាងប្រទេសអាហ្វហ្គានីស្ថាន និងប៉ាគីស្ថាន។

លោក Stephane Dujarric បាននិយាយថា លោក Guterres «កំពុងតាមដានដោយក្តីបារម្ភ ចំពោះរបាយការណ៍ អំពីការប៉ះទង្គិចគ្នាឆ្លងព្រំដែន រវាងកងកម្លាំងសន្តិសុខជាក់ស្តែង នៅក្នុងប្រទេសអាហ្វហ្គានីស្ថាន និងកងកម្លាំងសន្តិសុខប៉ាគីស្ថាន»។

លោក Dujarric បានបន្ថែមថា៖ «លោកអគ្គលេខាធិការជំរុញឲ្យភាគីពាក់ព័ន្ធគោរពតាមកាតព្វកិច្ចរបស់ខ្លួន ក្រោមច្បាប់អន្តរជាតិ ក្នុងនោះរួមទាំងច្បាប់មនុស្សធម៌អន្តរជាតិ និងធានាការការពារជនស៊ីវិលផងដែរ»។

អមដោយការកោតសរសើរ ចំពោះកិច្ចប្រឹងប្រែងសម្របសម្រួលដោយរដ្ឋជាសមាជិកមួយចំនួន ក្នុងរយៈពេលប៉ុន្មានខែថ្មីៗនេះ លោក Dujarric បានសង្កត់ធ្ងន់ថា លោក Guterres ក៏ជំរុញផងដែរឲ្យភាគីនានា បន្តប្រឹងប្រែងរកដំណោះស្រាយ ចំពោះការខ្វែងគំនិតគ្នាណាមួយ តាមរយៈការទូត។

គួរបញ្ជាក់ថា ប៉ាគីស្ថានបានទម្លាក់គ្រាប់បែកលើទីក្រុងធំៗ នៅអាហ្វហ្គានីស្ថាន ក្នុងនោះរួមទាំងរដ្ឋធានីកាប៊ុលផងដែរ នៅថ្ងៃសុក្រនេះ ដោយរដ្ឋមន្ត្រីការពារជាតិរបស់ទីក្រុងអ៊ីស្លាម៉ាបាដ បានប្រកាសថា ប្រទេសជិតខាងទាំង២ កំពុងស្ថិតក្នុង «សង្គ្រាមបើកចំហ» បន្ទាប់ពីមានការប៉ះទង្គិចគ្នាសងសឹកគ្នាទៅវិញទៅមកជាច្រើនខែ៕