ប្រមុខសិទ្ធិមនុស្សអង្គការសហប្រជាជាតិ (UN) លោក Volker Turk បាននិយាយកាលពីថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) ថា វិធានការនានារបស់អ៊ីស្រាអែល ទាំងនៅក្នុងតំបន់កាន់កាប់វេសប៊ែង (West Bank) និងហ្កាហ្សាស្ទ្រីប (Gaza Strip) ហាក់ដូចជាមានគោលបំណងបង្កើត «ការផ្លាស់ប្តូរប្រជាសាស្ត្រអចិន្ត្រៃយ៍»។

ក្នុងសុន្ទរកថាមួយ នៅចំពោះមុខក្រុមប្រឹក្សាសិទ្ធិមនុស្សរបស់ UN នៅទីក្រុងហ្សឺណែវ ប្រទេសស្វីស លោក Turk បានលើកឡើងថា៖ «ដោយពិចារណាលើគ្រប់យ៉ាង វិធានការរបស់អ៊ីស្រាអែលហាក់ដូចជាមានគោលបំណងបង្កើតការផ្លាស់ប្តូរប្រជាសាស្ត្រអចិន្ត្រៃយ៍ ទាំងនៅក្នុងតំបន់ហ្កាហ្សា និងវេសប៊ែង ដែលធ្វើឲ្យមានក្ដីបារម្ភខ្លាំងឡើងៗ អំពីការលុបបំបាត់ជនជាតិភាគតិច»។

លោក Turk បានចង្អុលបង្ហាញជាពិសេស អំពីប្រតិបត្តិការយោធាអ៊ីស្រាអែលដែលកំពុងបន្តមានរយៈពេលមួយឆ្នាំ នៅភាគខាងជើងនៃតំបន់វេសប៊ែង ដែលបាននាំឲ្យមានការបម្លាស់ទីលំនៅរបស់ជនជាតិប៉ាឡេស្ទីនចំនួន ៣២.០០០នាក់។

នៅកន្លែងផ្សេងទៀតរបស់តំបន់វេសប៊ែង សហគមន៍អ្នកចិញ្ចឹមសត្វ Bedouin ទាំងមូល ត្រូវបង្ខំផ្លាស់ទីលំនៅដោយសារការកើនឡើងនូវយាយី និងអំពើហិង្សា ពីសំណាក់អ្នកតាំងទីលំនៅជនជាតិអ៊ីស្រាអែល ក្នុងនោះរួមទាំងនៅជិតតំបន់ Mikhmas នៅភាគខាងកើតនៃទីក្រុង Ramallah និង Ras Ein al-Auja ចាប់តាំងពីដើមឆ្នាំនេះ។

គួរបញ្ជាក់ថា អ៊ីស្រាអែលបានអនុម័តគំនិតផ្តួចផ្តើមជាបន្តបន្ទាប់នៅក្នុងខែនេះ ដែលគាំទ្រដោយរដ្ឋមន្ត្រីស្តាំនិយមជ្រុល ក្នុងនោះរួមទាំងការចាប់ផ្តើមដំណើរការចុះបញ្ជីដីធ្លី នៅតំបន់វេសប៊ែង ជា «ទ្រព្យសម្បត្តិរដ្ឋ» និងការអនុញ្ញាតឲ្យជនជាតិអ៊ីស្រាអែលទិញដីធ្លីនៅទីនោះដោយផ្ទាល់ ជាចំណាត់ការដែលត្រូវបានថ្កោលទោសដោយប្រទេសជាច្រើន ក៏ដូចជាក្រុមហាម៉ាសផងដែរ៕