មន្ត្រីរុស្ស៊ីបាននិយាយថា បទឈប់បាញ់ក្នុងស្រុកមួយ បានចូលជាធរមាននៅជិតរោងចក្រថាមពលនុយក្លេអ៊ែរ Zaporizhzhia នៅភាគអាគ្នេយ៍អ៊ុយក្រែន នៅថ្ងៃសុក្រនេះ ដើម្បីអាចជួសជុលខ្សែភ្លើងខាងក្រៅ  បាន។ 

រោងចក្រនេះ ដែលជារោងចក្រធំជាងគេនៅអឺរ៉ុប បានស្ថិតនៅក្រោមការគ្រប់គ្រងរបស់រុស្ស៊ី ចាប់តាំងពីការចាប់ផ្តើមសង្គ្រាមនៅឆ្នាំ ២០២២ មិនយូរប៉ុន្មាន។ បច្ចុប្បន្ន វាមិនផលិតអគ្គិសនីទេ ហើយពឹងផ្អែកលើថាមពលខាងក្រៅ ដើម្បីរក្សាសម្ភារៈនុយក្លេអ៊ែររបស់ខ្លួនឲ្យត្រជាក់ និងជៀសវាងគ្រោះថ្នាក់ដ៏មហន្តរាយ។

រុស្ស៊ី និងអ៊ុយក្រែនតែងតែចោទប្រកាន់គ្នាទៅវិញទៅមកថា បានធ្វើឲ្យប៉ះពាល់ដល់សុវត្ថិភាព នៅរោងចក្រ ដោយធ្វើការវាយប្រហារនៅក្បែរនោះ។

បទឈប់បាញ់ក្នុងតំបន់ស្រដៀងគ្នានេះ ត្រូវបានបង្កើតឡើងកាលពីឆ្នាំមុន នៅពេលដែលខ្សែភ្លើង ត្រូវបានដាច់អស់រយៈពេលជាច្រើនសប្តាហ៍ ហើយទីតាំងនេះ ត្រូវបានបង្ខំឲ្យពឹងផ្អែកលើម៉ាស៊ីនភ្លើងម៉ាស៊ូត     សង្គ្រោះបន្ទាន់។

ថ្នាក់គ្រប់គ្រងរុស្ស៊ី បាននិយាយនៅក្នុងសេចក្តីថ្លែងការណ៍មួយថា បទឈប់បាញ់ចុងក្រោយបំផុតនេះ ត្រូវបានបង្កើតឡើង ដោយមានជំនួយពីលោក Rafael Grossi ប្រធានទីភ្នាក់ងារថាមពលបរមាណូអន្តរជាតិ៕