មន្ត្រីបានប្រាប់ឲ្យដឹងថា យោធាស៊ុយអែតបានស្ទាក់ចាប់យានដ្រូន ១គ្រឿង ដែលសង្ស័យថា ជារបស់រុស្ស៊ី នៅភាគខាងត្បូងប្រទេស ខណៈដែលនាវាផ្ទុកយន្តហោះបារាំង ១គ្រឿង កំពុងចតនៅកំពង់ផែទីក្រុង Malmo។ 

កងកម្លាំងប្រដាប់អាវុធ បានឲ្យដឹងកាលពីថ្ងៃព្រហស្បតិ៍ (ទី២៦ ខែកុម្ភៈ ឆ្នាំ២០២៦) ថា នាវាកងទ័ពជើងទឹករបស់ស៊ុយអែត ១គ្រឿង បានអង្កេតឃើញយានដ្រូនដែលសង្ស័យថា ជារបស់រុស្ស៊ី ក្នុងអំឡុងពេលល្បាតនៅដែនទឹក Oresund ជាច្រកសមុទ្រដែលបែងចែកប្រទេសស៊ុយអែត និងដាណឺម៉ាក។ ពួកគេបានបញ្ជាក់ថា វិធានការតបតដែលមិនបានបញ្ជាក់ឲ្យដឹង ត្រូវបានធ្វើឡើង ដើម្បីរំខានដល់យានដ្រូននោះ ហើយការទំនាក់ទំនងជាមួយយានដ្រូននោះ ត្រូវបានដាច់។

ចំណែកនាវាផ្ទុកយន្តហោះដើរដោយថាមពលនុយក្លេអ៊ែររបស់បារាំង ឈ្មោះ Charles de Gaulle ដែលស្ថិតនៅទីក្រុង Malmo ភាគខាងត្បូងស៊ុយអែត ក្នុងសប្តាហ៍នេះ គឺជាផ្នែកមួយនៃសកម្មភាពសមយុទ្ធជាប្រចាំរបស់អង្គការណាតូ (NATO)។ ទីក្រុង Malmo មានទីតាំងនៅច្រកសមុទ្រ Oresund ទល់មុខរដ្ឋធានី Copenhagen របស់ប្រទេសដាណឺម៉ាក។

អ្នកនាំពាក្យយោធាបារាំង លោក Guillaume Vernet បានប្រាប់សារព័ត៌មាន AP ថា យានដ្រូននេះ ត្រូវបានប្រទះឃើញកាលថ្ងៃពុធ ហើយត្រូវបានគ្រប់គ្រងដោយកងកម្លាំងស៊ុយអែតដែលត្រូវបានរួមបញ្ចូលទៅក្នុងប្រព័ន្ធសន្តិសុខ ជុំវិញនាវាផ្ទុកយន្តហោះ។ លោកបាននិយាយនៅថ្ងៃសុក្រនេះថា យានដ្រូននេះមានចម្ងាយជាង ១០គីឡូម៉ែត្រ ពីនាវា Charles de Gaulle៕