Google Maps អាចនឹងដំណើរការបានយ៉ាងត្រឹមត្រូវ ក្នុងពេលឆាប់ៗនេះ នៅក្នុងប្រទេសកូរ៉េខាងត្បូង បន្ទាប់ពីទីក្រុងសេអ៊ូល នៅថ្ងៃសុក្រ (ទី២៧ ខែកុម្ភៈ ឆ្នាំ២០២៧) នេះ បានយល់ព្រមចែករំលែកទិន្នន័យជាមួយកម្មវិធីដ៏ពេញនិយមមួយនេះ ប៉ុន្តែនឹងមានការរឹតបន្តឹងមិនឲ្យបង្ហាញទីតាំងយោធាដ៏រសើប។

ដូចចិន និងរុស្ស៊ីដែរ កូរ៉េខាងត្បូងស្ថិតនៅក្នុងចំណោមប្រទេសមួយចំនួនតូច នៅលើពិភពលោកដែលកម្មវិធី Google Maps មិនអាចដំណើរការបានពេញលេញទាំងស្រុង។

ទីក្រុងសេអ៊ូល បានបដិសេធម្តងហើយម្តងទៀតនូវសំណើសុំចែករំលែកទិន្នន័យផែនទីដែលមានភាពជាក់លាក់ជាមួយ Google ដោយអះអាងថា វាអាចបង្ហាញពីទីតាំងយោធាដ៏រសើប និងធ្វើឲ្យការការពារប្រឆាំងនឹងកូរ៉េខាងជើងមានកម្សោយ។

ក្រសួងដែនដីកូរ៉េខាងត្បូង បានកែប្រែគោលនយោបាយនេះ ក្រោយរយៈពេលជិត ២០ឆ្នាំ ដោយផ្តល់ការអនុញ្ញាតឲ្យចែករំលែកទិន្នន័យផែនទី ដោយមាន «លក្ខខណ្ឌសន្តិសុខតឹងរ៉ឹង»។

ក្រសួងបានឲ្យដឹងថា ទិដ្ឋភាពផ្លូវ និងរូបភាពតាមលំដាប់ពេលវេលាកើតឡើងកន្លងមក នៅលើ Google Earth ត្រូវតែបិទបាំងកន្លែងយោធា និងសន្តិសុខរបស់កូរ៉េខាងត្បូង។

ជាមួយគ្នានេះ ទីក្រុងសេអ៊ូលក៏នឹងឲ្យ Google លុបផងដែរនូវការបង្ហាញកូអរដោនេ និងដាក់ «ការរឹតបន្តឹងលើការបង្ហាញ» ពីទឹកដីកូរ៉េខាងត្បូង លើសេវាកម្មសកលរបស់ Google Maps និង Google Earth៕